Итальяннарны сокландырганнар, испаннар да басып алкышлар!

Уфа шәһәре Калинин районының горурлыгы, бик күп бәйгеләрдә җиңүче “Бәйрәм” халык бию ансамбле тагын Испаниягә Халыкара фестивальгә җыена.Нәрсә ул бию? Минемчә, бию – хисләргә чорналган тән хәрәкәте. Борынгы бабаларыбыз уңышлы аудан соң шатлык хисләрен бию теле аша җиткергән. Дини бәйрәмнәр, мәҗүси йолалар биюләрсез узмаган. Патша Русиясендә югары даирә вәкилләрен, белем алу белән беррәттән, биергә дә мәҗбүри рәвештә өйрәткәннәр. Бию – үз өстеңдә эшләү, куелган максатка ирешүнең бер юлы. Ул кешенең эчке дөньясын баета, аның һәрьяклап үсешенә ирешүгә ярдәм итә. Халык биюләре аеруча кыйммәткә ия. Анда халыкның тормыш-көнкү­реш үзенчәлекләре, тарихы, гореф-гадәте чагыла. Бию хәрәкәтләре, музыка, костюмнар халыкның матурлыкны ни дәрәҗәдә нечкә тоя белүен күрсәтә.Бүген сүзебез Уфа моторлар төзү берләшмә­сенең “Бәйрәм” халык бию ансамбле турында. 1997 елның сентябрендә бер­ләшмәнең Мәдәният сараенда “Энҗе” халык бию­ләре ансамбле нигезен­дә яңа коллектив төзелә. Шулай итеп, “Бәйрәм” ансамб­ленең тарихы башлана. Ике дистә ел эчендә бу коллектив бихисап төбәкара, республика бәйге-фестиваль­ләрендә катнашкан, Италия, Испания, Португалия, Греция сәхнәләрендә чыгыш ясап, җиңүләргә ирешкән. Бу уңышлар артында күпме көч, тырышлык, авырлыклар ятканын “Бәйрәм”не беренче көнен­нән алып җитәкләүче, иҗат коллекти­вының кыйбласын билге­ләп, аны дөньяга чыгарган җитәкче үзе генә беләдер. Ансамбльнең алыштыргысыз җитәкчесе – Русия Федерациясе гомум мәгарифенең мактаулы хезмәткәре Айрат Нәбиул­лин.

Добавить в предпочтительные источники Google