Зал юк, дип моңаймыйлар, зур үрләрне яулыйлар!

Шунысы сөендерә: бүген Мәдәният сарае ремонтка ябылса да, биредә мәдәни тормыш гөрләп тора. Төрле чаралар оештырыла, конкурс-фестивальләр үтә. Күптән түгел “Бүләк” халык театры коллективы Фәр­дүнә Касыймова призына “Тамаша” республика фес­тивалендә “Иң яхшы актерлар ансамбле” номина­циясендә бил­геләнде.
– Зур концертларны акт­лар залында үткәрәбез. Җәен концертлар Мәдәният сарае алдында һәм “Яшьлек” паркында була. Ә Яңа елны әлегә фойеда гына каршы алырга туры килде, чөнки залыбыз авария хәлендә, – ди район хаки­миятенең Мәдәният, спорт һәм яшьләр сәясәте идарәсе начальнигы Альфред Хаҗи­муллин.
Мәдәният сараен төзек­ләндерүгә акча бүленгән, күптән түгел генә тендер үтте. Биредә балалар, медицина, спорт, күнегүләр бүлмәләре булачак, зал киңәйтеләчәк, барлык уңайлыклар да тудырылачак. Төзеклән­дерел­гәннән соң ул “Гаилә белән ял итү мәдәни үзәге” дип аталачак. Ел ахырына төзекләндерү эшләре тәмамланып, зал ачылырга тиеш.
– Бәйрәмгә боздан сыннар, бизәкле тау эшләдек. Күркәм чыршыбызда утлар кабыздык, сценарийлар төзеп, тамашалар эшләп, кешеләрне тылсымлы әкият иленә сәяхәткә алып бардык, – ди Альфред Зәүкат улы.
Биредә зал юк, дип тормыйлар, яңадан-яңа үрләр яулыйлар. Альфред Хаҗи­муллин үзе дә җор телле, шигъри җанлы. Күптән түгел генә Башкортстанның дәүләт (муниципаль) власть органнары эшчәннәре һәм хезмәт коллективлары арасында “Башкортстан – горурлыгым минем” республика үзешчән сәнгать смотр-конкурсында ул “Автор әсәре” номинациясендә беренче урын яулаган. Шулай ук “Ата-бабалар авазы” төбәкара әдәби-шигъри фестиваль-конкурсында “Шагыйрь-публицистлар” но­минациясендә I дәрәҗә лауреат дипломы белән бүләк­ләнгән.
Аскын районының Мәдә­ният сараен тиз арада төзекләндереп, гөрләтеп эшкә кушарга насыйп булсын дигән теләктә калыйк!

Энҗе ИБРАҺИМОВА.