“Көмеш Акбузат”ның алтыны кемдә?

Аның тәүге көнендә “Родина” кинотеатрында дөнья кинокартиналары күрсәтелә башлады, алар арасында премьералар да булды. Кинофестивальне тантаналы ачу алдыннан мөхтәрәм кунаклар, жюри һәм “Көмеш Акбузат”та катнашучылар фотокамералар уты гөлтләве астында кызыл келәмнән уздылар. Шулай итеп, башкала халкы һәм кунаклары танылган кино эшлеклеләрен якыннан күрә алды.

Хөрмәтле кунаклар – танылган кинорежиссер, сценарист, продюсер Кшиштоф Занусси (Польша), продюсер Бәйрәм Бәйрәммөхәммәтов (Төркия), Русия Кинемато­графиячеләре берлеге рәи­сенең беренче урынбасары Николай Бородачев, Санкт-Петербург Дәүләт кино һәм телевидение инсти­тутының киновидеоаппаратура кафедрасы профессоры Галина Тихомирова, “Татаркино” директоры, продюсер, сценарист Миләүшә Айтуганова, кинорежиссер, сценарист, актер һәм кинооператор Ходжакули Нарлиев, театр һәм кино актрисасы, сценарист, СССРның халык артисты Мая-Гүзәл Аймедова (Төрек­мәнстан), танылган продюсер, актер Асенов Арман Турсун улу (Казахстан), сценарист, кинорежиссер Айдар Акманов (Мәскәү), театр һәм балет актрисасы Сюзан Мери (Испания), театр һәм кино актрисасы, сценарист, язучы Татьяна Бронзова (Мәскәү), танылган кино тән­кыйтьчесе, киновед Гөлбара Толомушова (Кыргызстан), продюсер Екатерина Бабалова, танылган совет һәм кино актеры, Русиянең халык артисты Борис Щербаков, Русиянең атказанган артисты Даниил Спиваковский, Русия Федерациясенең атказанган артисты, театр һәм кино актрисасы Анастасия Макеева, “Великолепный век” сериалы “йолдызы” Селим Бәйрактар (Төркия).

Кинофестивальнең иң бай программасы Русия киносы көнендә булды. Ул Башкортстан Опера һәм балет театрында кинофестиваль кунаклары һәм йолдызлары катнашлыгында “түгә­рәк өстәл” белән башланды. Биредә милли киноны үстерү мәсьәләләре хакында фикер алыштылар. Соңрак “Арт-Квадрат” үзәгендә актер Александр Головин (“Кадетство” сериалы) һәм Польша режиссеры Кшиштоф Занусси белән иҗади очрашулар узды.

Ә кичен “йолдызлар” “Торатау” Конгресс-холлында кызыл ке­ләмнән узды. Шунда ук чараның ябылу тантанасы һәм “Көмеш Акбузат”та җиңүчеләрне бүләкләү булды, Гран-при иясенең исеме аталды.

Режиссер Любовь Борисовага “Минем кояш баемый” (Саха-Якутия) дигән дебют фильмы өчен мифик канатлы ат статуэткасы һәм бер миллион сумлык сертификат тапшырылды. Төп бүләкне жюри рәисе, театр һәм кино артис­ты, телетапшырулар алып баручы, РСФСРның халык артисты Сергей Шәкүров тапшырды.

Фильм, шулай ук, “Социаль һәм мотивацион кино” номинациясендә тулы метражлы иң яхшы уен фильмы дип танылды. Комедия элементларына бай якты драма Николай Луги­новның “Таш борын” повесте мотивлары буенча төше­релгән.

Ул дебют актерлык эше белән дә үзенчәлекле — төп рольне профессиональ булмаган актер, 73 яшьлек Степан Петров башкарды. Гомере буе ул авылда яши, шофер булып эшли. Әгәр элек актер халык театрында гына уйнаса, хәзер, 70 яшь­тән соң, чын “йолдызга” әверелде. Әлегә аның иҗат багажында нибары ике фильм бар.

Фестивальне ябу тантанасыннан соң Уфа амфитеатрында танылган фильм­нардан саундтреклардан Русия киносы көненә багышланган “Симфония төне” оештырылды. Ачык һава­да танылган артистлар, Баш­кортстанның Милли симфоник оркестры чыгыш ясады. Оркестр белән Зур театрдан (Мәскәү) Дмитрий Крюков дирижерлык итте.

Кино­фести­валь һәм “Симфония төне” фейерверк белән тәмамланды.

“Мәдәният” гомумдәүләт проекты кысаларында “Кө­меш Акбузат” IV халыкара кинофес­тиваленең ябылу тантанасы “Мәдәният.рф” порталындагы туры эфирда күрсәтелде. Илнең төп мә­дәни платформасында аны күрсәтү “Мәдәният” гомум­дәүләт проектының “Санлы мәдәният” төбәк проектын гамәлгә ашыру нәтиҗәсендә мөмкин булды.

Шулай итеп, өч көн дәва­мында “Родина” кинотеатрында 18 илдән 49 фильм күр­сәтелде. Конкурс программасында Австралия, Азәр­бай­җан, Әрмән­стан, Һинд­стан, Кытай, Мьянма, Индонезия, Иран, Казахстан, Кыргызстан, Литва, Непал, Молдова, Руанда, Үзбәкстан, Фран­ция, Көньяк Корея фильм­нары тәкъдим ителде.

— Быелгы фестиваль, башкалары белән чагыштырганда, аеруча күтәренке рухта узды, халыкара даирәне тулысынча иңләде, халыклар һәм мәдәниятләр арасында дуслык күперләрен ныгытты, — диде Русия Кинемато­графиячеләре берлеге рәи­сенең беренче урынбасары Николай Бородачев. – Аны оештыручыларның, республика җитәкчелегенең кино сән­гатен үстерүгә, шул юл белән биредә яшәүче ха­лыкларның рухи тормышын баетуга зур игътибар бирүе – шатлыклы күренеш.