+21 °С
Болытлы
Мәдәният һәм сәнгать
7 июнь 2021, 18:34
83 яшендә дә чигүне ташламый
Кушнаренко районының Әхмәт авылы Мәдәният йорты "Кызыл тан" гәзите "ВКонтакте" социаль челтәрендә (https://vk.com/kiziltan102) оештырган "Сабантуй сөлгесе" дип исемләнгән флешмобта катнаша. Сабантуйлар чорында борынгы йолаларны искә төшереп, күзнең явын алып торган сөлгеләрне чигүче апалар белән таныштырып китик әле.Таныш булыгыз: кул эшләре остасы Әхмәдиева Фәсәхия Габдулла кызы. Фәсәхия апага 83 яшь. Чыгышы белән үзебезнең Илек авылы кызы. 83 яшендә дә чигүне ташламый.
Кушнаренко районының Әхмәт авылы Мәдәният йорты "Кызыл тан" гәзите "ВКонтакте" социаль челтәрендә (https://vk.com/kiziltan102) оештырган "Сабантуй сөлгесе" дип исемләнгән флешмобта катнаша. Сабантуйлар чорында борынгы йолаларны искә төшереп, күзнең явын алып торган сөлгеләрне чигүче апалар белән таныштырып китик әле.
Таныш булыгыз: кул эшләре остасы Әхмәдиева Фәсәхия Габдулла кызы. Фәсәхия апага 83 яшь. Чыгышы белән үзебезнең Илек авылы кызы. 83 яшендә дә чигүне ташламый.
Әхмәт авылына 1967 елда килен булып төшкән, төшкән җирендә таш булып, менә 57 ел инде шушында игелекле гомер кичерә. Тормыш иптәше Шәйхамбәр абый белән ике балага гомер бирәләр. Кызлары Зилә, уллары Илфир үз гаиләләре белән Уфада яшиләр.
Фәсәхия апа үз гомерендә бер җирдә эшләде: 34 ел Әхмәт урта мәктәбенең алыштыргысыз лаборанткасы, эшләр башкаручысы булды.
Яшьлеге 1955 елларга туры килгән Фәсәхия апа болай дип сөйли: "Безнең заманда тегә-чигә белмәгән кыз юк иде, кышкы озын кичләрдә, әниләргә ияреп, без, кыз-кыркын, бергә җыелышып, чигү чигәбез. Кулъяулыклардан башласак, соңрак сөлгеләр, мендәр тышлары, ашъяулыклар чиктек. Шулай әкренләп сандыкка бирнә җыйдык. Бирнәсез кияүгә чыкмыйлар иде бит. Бинә – синең уңганлыгыңны, булганлыгыңны күрсәтә, шунын өчен дә һәр кыз бала кулыннан килгәнчә, әниләр ярдәмендә, күркәм бирнә булдырырга тырыша иде.
Сабантуйларга махсус сөлге чигә идек. Бүләкләр җыеп йөргән бабайлар сөлгене мактап алса, шуннан да зур шатлык юк иде. Сөлгеләр бәйләнгән таякның очында – иң матур сөлге – зур горурлык иде", – дип искә ала Фәсәхия апа.
Соңрак, заманалар үзгәреп, чиккән әйберләрнең модасы берникадәр кимесә дә, Фәсәхия апа чигү-тегү эшен ташламады, гомерлек мавыгуы итте.
Олы яшьтә булуына карамастан, ул бүген дә бик яратып чигә, бәйли, эрли, тегә. Авылдашлары ярдәм сорап килсә, берсенең дә үтенечен кире какмый, кулыннан килгәнчә ярдәм итә, кешеләргә кирәк булып яши безнең алтын куллы Фәсәхия апабыз.
Зәмбилә ФӘХРЕТДИНОВА.
Кушнаренко районы.
Зәмбилә Фәхретдинова фотосы.
