-21 °С
Болытлы
Гәзиткә язылуVKOKTelegram
Барлык яңалыклар

Таулар кызы дала ягын үз итте

Башкортстанның атказанган мәдәният хезмәткәре, Мәләвез районы һәм шәһәренең шәрәфле шәхесе Фәнисә Якуповага – 70 яшь.

Башкортстанның атказанган мәдәният хезмәткәре, Мәләвез районы һәм шәһәренең шәрәфле шәхесе Фәнисә Якуповага – 70 яшь.

Күптән түгел Мәләвез шәһәре Мәдәният сараенда 50 ел гомерен сәнгатькә багышлаган шәхес Фәнисә Якупова хөрмәтенә тантаналы кичә узды.

Фәнисә Сөнәгатулла кызы Бүздәк районының Таулар авы­лында туган. Ул чакта аның әтисе Сөнәгатулла һәм әнисе Рәйсә кызларының сән­гать юлыннан китәрен күз алдына да китермәгәндер. Хәер, кызчык үзе дә табиб һөнәрен сайларга хыяллана. Тик аның планнары үзгәрүгә мәктәпкә яңа гына эшкә килгән укытучы сәбәпче була. Яшь кенә укытучы бар күңелен биреп, балаларны җырга, биюгә өйрәтә. Авыл клубында, мәктәптә балалар кат­нашлыгында концертлар гөрләп үтә. Менә шул чакта зур сәхнә турында хыяллана башлый да инде Фәнисә. Җыр-моңны яраткан, укуын яхшы бил­геләренә генә тәмамлаган кыз күрше авыл мәктәбенә пионервожатый булып эшкә урнаша. Ике елдан соң Уфа сәнгать училищесына укырга керә. Аны читтән торып укып бетерә һәм бер үк вакытта Бүздәк балалар музыка мәктә­бендә эшли. Нәкъ шул чорда республикада районнар арасында алмаш концертлар оештырыла. Бүздәк районы үзеш-чән артистлары Мәләвезгә бара. Анда Фәни­сәнең чыгышын бик яраталар һәм аны үзләренә эшкә чакыралар. Күп тә үтми ул Первомайский авыл мәдәният йор­тының сәнгать җитәкчесе булып эшли башлый. Өч елдан соң ул оештырган башкорт хоры “Елның иң яхшы хоры” номинация­сендә шәһәр һәм районның күчмә кубогын яулый.
Шушы елларда Фәнисә Сөнәгатулла кызы тормыш юлын талантлы музыкант Роберт Якупов белән бәйли. Алар хатын-кызлар татар вокаль, урыс фольклор, балалар бию ансамбльләре оештыра. Бу коллективлар бик күп район, шәһәр, республика чараларында катнашып, аларның чагу бизәге була.
1985 елда бу талантлы парны шәһәр мәдәният йортына эшкә чакыралар. Фәнисә Сөнәгатулла кызы белән Роберт Хәнәфи улы тагын эшкә чума. Фәнисә Якупова төзегән башкорт вокаль ансамбле бик күп республика конкурс һәм фестивальләрендә җиңү яулый. Башкортстан радиосы фондында да бу ансамбль башкарган җыр­лар саклана.
Фәнисә Сөнәгатулла кызы “Агыйдел” башкорт эстрада-фольклор ан­самбленең алыштыргысыз солисты була. Бу коллективны Курган, Чиләбе, Свердловск, Ырынбур өлкә-ләре дә алкышка күмә.
1995 елда Фәнисә Якупованы район мәдәният йортына чакыралар. Монда да ул башкорт хоры һәм “Рәйхан” татар вокаль ансамбле оештыра. Бу коллективлар да республика конкурсларында җиңү артыннан җиңү яулый. Озакламый бу ике коллективка да “халык” исеме бирелә.
Фәнисә Сөнәгатулла кызы район мәдәният йортында эшли башлаган елны шәһәрдә 9нчы башкорт гимназиясе ачыла. Аның директоры Тәнзилә Муллабаева талантлы, үз эшенең остасы булган Фәнисә Якуповага гимназия каршында балалар вокаль ансамбле ачар­га тәкъдим итә. Фәнисә Сөнәга­тулла кызы бу эшкә дә бик теләп риза була. Ан­самбль­дә катнашучылар җыр башкару осталыгын чарлаудан тыш, халык җырларының та­рихын өйрәнә, лекция-концертлар оештырыла. Бу ансамбль-дә шөгыль­ләнгән балалар тормышта үз юлларын таба. Араларында укытучылары үрнә­гендә сәнгать юлын сайлаганнары да бар. Әйткәндәй, бу күркәм кичәдә аларның чыгышы дә бәйрәмне бизәде.
Фәнисә Сөнәгатулла кызына “Көн­гәк” халык бию ансамбле солисты буларак, ике чит ил үзешчән сәнгать фес­­ти-валендә катнашырга насыйп була.
Фәнисә Якупова хезмәт юлын әле дә тәмамламаган.
– Мин үз эшемне чиксез яратып башкардым һәм башкарам. Ә яраткан эш бервакытта да ялкытмый. “Рәйхан” татар вокаль ансамблен 27 ел буе җитәкләү дәверендә
2-3 состав җыр­чыларым алышынды. Иң бе­рен­челәрдән булып йөри башлаган Земфира Әхмәтҗанова, Фәрзәнә Имән­гу­лова әле дә ансамбль әгъ-залары. Коллективка үзлә-ре­нең төп эшләреннән тыш йөриләр. Араларында берничә елдан соң кире ансамбльгә кайтканнары да бар. Монда укытучылар да, медицина хез-мәт­кәрләре дә, гомумән, төрле һөнәр ияләре йөри. Мин алар-ның һәрберсенә зур рәхмәт-лемен. Бу коллектив белән республика һәм Бөтенрусия конкурсларында җиңүләр яуладык. 2019 елда “Рәйхан”ның 25 еллык юбилеен зур концерт белән билгеләп үттек, – ди Фәнисә Сөнәгатулла кызы.
Җыр-моңга үрелеп барган чараның уртасында юбиляр үзе һәм берсеннән берсе матур җырлар булды. Юкка гына кичәнең исеме дә “Җырлы гомер юллары” дип аталмаган иде. Ә инде Фәнисә Сөнәга­тулла кызы тарафыннан үтел­гән җырлы тормыш юлының бизәге – ул аның ике кызы һәм бер улы. Бүген ин-де ул 6 оныкка яраткан карт­әни булып яши.

Зөһрә ИСЛАМОВА.


Читайте нас в