Барлык яңалыклар

Рәссам күзләре белән

Вәкил Шәйхетдинов иҗат иткән сәнгать әсәрләреннән.

Вәкил Шәйхетдинов иҗат иткән сәнгать әсәрләреннән.

Бүздәк районы үзәк китап­ханәсендә Башкорт­станның атказанган рәссамы, Татар­станның атказанган сәнгать эшлеклесе Вәкил Шәйхетди­новның юбилее уңаеннан аның иҗатына багышланган очрашу үтте.

Район хакимияте башлы­гының социаль һәм кадрлар сәясәте буенча урынбасары Гөлфия Габдрәфый­кова юбилярга үсеп килүче буынны тәр­бияләүгә, районның мәдәни тормышын саклауга һәм үстерүгә керткән зур өлеше өчен район хаки­миятенең Мактау грамотасын тапшырды. Котлауларга мә­дәният бүлеге начальнигы Гөлназ Шәяхмәтова, район китапханәсе директоры Зөлфия Вәлиуллина, Кәпәй-Кобау авылы биләмәсе башлыгы Рөстәм Латыйпов, Башкортстан Республикасы Халыклар дуслыгы йорты филиалы, татар мәдәни үзәгенең баш белгече Гүзәл Гәүһәрова, Вәкил Гыйлем улының туганнары, якташлары юбилярга изге теләкләрен җиткерделәр. Китап­ханә хез­мәткәре Рита Дистанова башкаруындагы дәртле җырлар кичәгә олы ямь өстәде.
Күргәзмәгә рәссамның иҗатын хөрмәт итүче, күңел­ләре матурлыкка омтылучы, гүзәллекне тоя белүче кешеләр җыелган иде. Рәссамга һәркем үзен кызыксындырган сорауларын бирде, картиналарын хозурланып карады.
Талантлы якташыбыз Бүз­дәк районының урман арасына сыенып утырган гүзәл табигатьле Кәпәй-Кобау авылында 1951 елның 4 маенда туа. Аның картиналарында тормыш үзе чагылыш тапкан. Мәккәгә хаҗ кылганнан соң, өч дин тарихына багышланган “Иудизм, Христианство, Ислам” сериясен иҗат итте.
Казан милли-мәдәни үзәге өчен “Төрки дөньясы” монументаль панносы иҗаты югары бәяләнде. Рәссамның башка эшләре Башкортстан дәүләт сәнгать музее, Казан милли-мәдәни үзәгенең музее коллек­цияләрендә, Русиядә һәм чит илләрдә шәхси колле­цияләрдә саклана.
Иҗатчының соңгы күргәз­мәләре Казан милли-мәдәни үзәгендә Кол-Шәриф мәче­тендә үткәрелде. Алдагы күргәзмәсен рәссам Казандагы “Хәзинә” галереясында көз айларына планлаштыра.
Күптән түгел генә Уфа сынлы сәнгать галереясында Вәкил Шәй­хетдиновның 39нчы шәхси күр­гәзмәсе булып үтте. Галереяда рәссамның төрле жанрда язылган 88 картинасы урнаштырылган. Аның иҗатында туган як табигате үзенчәлекле гәүдәләнеш таба. Пейзажларда – туган авыл күренешләре. Һәрберсе үзенчә – рәссамның туган авылындагыча. Якташыбызга сәнгать дөнья­сында яңадан-яңа иҗади уңышлар теләп калабыз.

Римма Садыйкова.
Бүздәк районы.
Автор:Зөһрә Исламова