+21 °С
Болытлы
Мәдәният һәм сәнгать
17 гыйнвар 2022, 09:30
Безнекеләр дисеннәр!
Хезмәттәшебез, “Кызыл таң” гәзите журналисты Гөлнара Гыйлемханова Әнгам Атнабаев исемендәге мәртәбәле премиягә тәкъдим ителде.
Безнекеләр дисеннәр!
Гөлнара Гыйлемханова “Кызыл таң” гәзите редакциясенә 2007 елда өлгергән журналист буларак эшкә килде. Казан дәүләт университетының журналистика факультетын тәмамлап, ул инде озак еллар Краснокама район гәзитендә эшләгән, тәҗрибә туплаган, каләмен чарлаган белгеч иде. Мөхәррир урынбасары вазыйфасын калдырып, республика гәзитендә Краснокама, Яңавыл, Тәтешле, Калтасы районнары, Нефтекама, Агыйдел шәһәрләре буенча үз хәбәрче булып эшли башлады ул. Гәзит укучы аның үткер каләмен тиз үз итте, аналитик, фәлсәфи, кайчак усал һәм тәнкыйть мәкаләләрен көтеп ала башлады. Һәр нәрсәгә үз фикере, үз карашы булган һәм аны кыю җиткерүче журналист итеп танытты үзен Гөлнара Рәшит кызы. Аның үзе яктырткан район һәм шәһәр хакимиятләренең, шулай ук төрле министрлыкларның, Дәүләт җыелышы-Корылтайның, “Бердәм Русия” партиясенең күпсанлы
Мактау грамоталары белән бүләкләнүе очраклы гына түгел. “Кызыл таң”да эшләгән дәвердә ул гәзитнең лауреаты булды, “ЛедиЖур” Бөтенрусия конкурсында җиңеп, Мәскәүгә Матбугат балына чакырылды.
Гөлнара Рәшит кызы якташы, заманында безнең коллективта хезмәт салган Башкортстанның халык шагыйре Әнгам Атнабаевның эшен лаеклы дәвам итә, дип әйтергә дә тулы нигез бар. Әнгам Атнабаев кебек үк, туган ягын, үз авылын бик ярата ул. Шулай ук без Гөлнараны алдагы көнгә, киләчәккә йөз тотып эшләүче журналист буларак беләбез. Хәзер “Атайсал” программасы турында бик күп сөйлиләр, һәм журналистлар бу теманы еш яктырта. Гөлнара Гыйлемханова исә бу эшне күпкә иртәрәк башлаган һәм бүгенге көнгә кадәр дәвам итүче кеше — туган авылында бик күп изге эшләр башкарды ул. Без Гөлнараның моннан берничә ел элек туган авылында шәҗәрә бәйрәме — “Гамил җыены” үткәрүен хәтерлибез. Бүгенге көндә әлеге эшне дәвам итеп, ул Тәтешле районының шәрәфле шәхесе, республикада танылган партия эшлеклесе Надим Гамиловның исемен мәңгеләштерү өстендә эшли.
Шулай ук аның “Помним поименно” — “Һәрберсе хәтердә” проекты игътибарга һәм тирән ихтирамга лаек. Әле “сугыш чоры балалары” статусы рәсми танылу алганчы ук, Гөлнараның бу юнәлештә зур эзләнү эшләре алып баруы, районнарда сугыш чоры балаларының исемлеген тергезүе хөрмәткә лаек. Узган елда исә Гөлнара Рәшит кызы “Краснокама районының Алтын китабы”н әзерләп нәшер итте. Хәзер бу эшне башка районнар да күтәреп алды.
Күптән түгел илебездә беренче тапкыр Әтиләр көне билгеләп үтелде. Гөлнара Рәшит кызы әтиләрнең абруен, гаиләдәге статусын күтәрү буенча күп еллар актив эшләп килә. Аның “Әтисе баласы” проекты ярдәмендә күпме талантлы әтиләр һәм балалар: спортчылар, музыкантлар, кул осталары хөрмәт казанды. Бу да Гөлнараның җәмгыять үсеше максатларын һәм бурычларын төптән аңлаган, заман сулышын тоеп яшәгән, иң мөһим, иң кирәкле темаларны алга сөргән, җитлеккән журналист булуын дәлилли.
Гөлнара Рәшит кызы журналист эше белән генә беркайчан да чикләнмәде. Ул район һәм шәһәрнең иҗади тормышында актив катнаша, “Кызыл таң” республика гәзите белән берлектә яңадан-яңа проектлар тәкъдим итә. Данлыклы якташыбыз Роберт Миңнуллин белән республикабызның төньяк-көнбатыш районнары буйлап үткән “Миңнуллинлы маршрут” та “Кызыл таң” гәзите тарихында матур истәлек булып калды. Шулай ук без Гөлнара Гыйлемханованы йөзәр гармунчыны бергә җыеп “Кызыл таң” гәзите исеме астында “Гармун бәйрәме”н оештыручы буларак та, Ә. Атнабаевның иҗат кичәләрен үткәрүче буларак та беләбез. Шулай итеп, Гөлнара гәзит-журнал битләре аша гына түгел, сәхнә аша да гәзит укучыларны тәрбияли, халыкны мәдәни агартуга, традицияләребезне саклауга зур өлеш кертә. Үткән яз Гөлнара Гыйлемханова Башкортстан татарларының милли-мәдәни автономиясе белән берлектә Нефтекамада гөрләтеп “Бәлешфест” бәйрәмен үткәрде һәм тагы бер тапкыр шәһәр халкының сөюен яулады.
Билгеләп үтүебезчә, Гөлнара Гыйлемханова Әнгам Атнабаевның иҗади мирасын саклау һәм киңкатлам халыкка җиткерү юнәлешендә күп эш башкара. Аның “Знай наших!” — “Без-некеләр дисеннәр! — “What are we like!” проекты шагыйрьләрнең, шул исәптән Ә. Атнабаевның иҗатына аудио, видеоконтент булдыруга юнәлтелгән. Проектның кыйммәте шунда: ул балалар катнашлыгында тормышка ашырыла. Шушы көннәрдә журналист социаль челтәрләрдә “Atnabai: without borders! — Атнабай: без границ!” “Атнабай: чикләр юк!” дигән халыкара флешмоб игълан итте.
Гөлнара Рәшит кызы – гәзит укучылар тарафыннан танылган һәм яраткан журналист, бу турыда, аның мәкаләләре басылып чыккач, редакциягә күпсанлы шалтыратулар да сөйли. Ул үзен җаваплы, сәләтле, иҗади белгеч буларак танытты. Киң күңелле, кешелекле, кечелекле хезмәттәшебез коллективта зур хөрмәткә ия.
“Кызыл таң” гәзите коллективы Тәтешле районы Юрмиязбаш авылында туып үскән хезмәттәшебез Гөлнара Рәшит кызы Гыйлемханованы Әнгам Атнабаев исемендәге иҗади премиягә, һичшиксез, лаек дип саный.
“Кызыл таң” гәзите коллективы.
