Флешмоб барлык геройларыбызга багышлана!

Акция кысаларында республика башкаласының өч урынында Башкортстан композиторы Заһир Исмәгыйлевнең «Шәйморатов-генерал» җыры башкарылды. Флешмоб шулай ук безнең хәрби махсус операциядә катнашучы егетләргә һәм Башкортстаннан мобилизацияләнгән гражданнарга әхлакый ярдәм күрсәтүнең тагын бер ысулы булды.

"Планета" сәүдә-күңел ачу үзәгендә узган флешмобта башкаланың алдынгы коллективлары - Уфаның «Мирас» җыр һәм бию ансамбле, шәһәр Мәдәният сарае, шәһәрнең Мәдәни-ял үзәге, Уфаның балалар филармониясе һәм «Башкортостан» дәүләт концерт залы катнашты.

Башкортстан сугышчылары гимны булган «Шәйморатов - генерал» җырын 250гә якын кеше бергә башкарды. Уфа артистлары флешмобына сәүдә үзәгенә килүчеләр дә кушылды. Артистлар чыгышларын "Без үзебезнекеләрне ташламыйбыз!" дигән сүзләр белән тәмамлады.

- «Шәйморатов - генерал» җыры республиканың һәр вокаль коллективы репертуарында бар. «Мирас» ансамбле быел 30 еллык юбилеен билгеләп үтә һәм шушы еллар дәвамында әлеге легендар җырны башкара. Бүген дә без аны бик теләп җырладык, - дип сөйләде Башкортстанның атказанган мәдәният хезмәткәре һәм атказанган сәнгать эшлеклесе, «Мирас» ансамбленең сәнгать җитәкчесе Нәфирә Икъсанова.

«Мирас» ансамбле артисты Сәлимә Юлдашбаева, җырны башкарган вакытта, күз алдына хәзерге вакытта махсус хәрби операция зонасында булган туган энесен китерүен билгеләп үтте.

- Бу флешмоб безнең солдатларыбызга гына түгел, өйдә көтүчеләргә дә ярдәм итәр дип өметләнәм, - дип уртаклашты артист.