Дуслык күпере ныгытылды

Уфа шәһәрендә Г. Камал исемендәге Татар дәүләт академия театрының зур гастрольләре аншлаг белән узды.

Гастрольләрнең беренче өч көне Уфа “Нур” татар дәүләт театры сәхнәсендә булса, калганнары М. Гафури исемендәге Башкорт дәүләт академия драма театрында үтте. Сигез көн дәвамында барган һәр спектакль шыгрым тулы залларда барды, тамашачыларның көчле алкышларына күмелде.
Әйткәндәй, камаллыларның репертуары да кызыклы иде. Монда классика белән беррәттән, шулай ук заманча, эксперименталь әсәрләр дә күрсәтелде. Театр коллективы Кәрим Тинчуринның — “Сүнгән йолдызлар”ын, Айдар Җаббаровның — “Хуш, авылым” һәм “Хуш, авылым. Хыял” документаль спектакльләрен, Мәхмүт Галәүнең — “Болганчык еллар. Мөһәҗирләр”, Илгиз Зәйниевның — “Өйләнәм.tat” усал комедиясен, Артур Шәйдулланың — “Сагынырсызмы?..”, Александр Володинның — “Санаулы кичләр”, Кәрим Тинчуринның “Зәңгәр шәл” музыкаль комедиясен тамашачылар хөкеменә чыгарды.

Моннан тыш, камаллылар Уфадагы гастрольләре кысасында төрле чараларда да катнашты. Коллектив артистлары Уфаның 65 һәм 84нче татар гимназияләрендә укучылар өчен остаханә, тренинглар оештырса, “Кызыл таң” гәзите редакциясендә журналистлар белән аралашты. Ә инде театрның баш режиссеры Фәрит Бикчәнтәев һәм аның төрле елдагы шәкертләре Заһир Исмәгыйлев исемендәге сәнгать институтында очрашуда булды.
Безнең редакциягә Г. Камал татар дәүләт театры артистларының иң-иңнәре килгән иде, дисәм, һич арттыру булмас, чөнки аларның һәркайсы дистәләрчә рольләр уйнаган, образлар тудырган, дәрәҗәле исемнәр һәм иң мөһиме – бик күптән халык мәхәббәтен яулаган шәхесләр. Менә алар: Г. Тукай исемендәге Татарстан дәүләт, Муса Җәлил исемендәге республика премияләре лауреаты, Русиянең атказанган, Татарстанның халык артисты Илдус Әхмәтҗанов, Татарстанның халык артисты Әсхәт Хисмәтов, Татарстанның халык артисты Илсөя Төхвәтуллина, Русиянең атказанган, Татарстанның халык артисты Илдар Хәйруллин, Татарстанның атказанган артисты, Муса Җәлил исемендәге республика премиясе лауреаты Илнур Закиров.
Мәртәбәле кунаклар белән сөйләшү “түгәрәк өстәл” артында бик тә кызыклы, җанлы барды. Очрашуны ачып, “Кызыл таң” гәзитенең баш мөхәррире Фаил Фәтхетдинов бер гасырдан артык тарихы булган гәзитебез, монда эшләп, чыныгу алып, зур үрләр яулаган танылган шәхесләр турында да кызыклы мәгълүматлар җиткерде.
– Бүген сезне редакция кунаклары сыйфатында күрүебезгә бик шатбыз, чөнки “Кызыл таң” белән Г. Камал театры арасында дуслык күпере инде күптән салынган. Шулай да, 2008 елда булган соңгы очрашудан соң бик күп вакыт узган, шуңа күрә дә гәзитебезнең тарихы белән дә бераз таныштырып узам. Республика тарихында 104 яшьлек “Кызыл таң” гәзите зур урын алып тора. Әйткәндәй, монда төрле еллар дәвамында Башкортстанның биш халык шагыйре – Мәҗит Гафури, Сәйфи Кудаш, Әнгам Әтнабаев, Абдулхак Игебаев, Равил Шаммас һәм ике халык язучысы – Нәҗип Асанбаев белән Суфиян Поварисов хезмәт куйган. Алар барысы да бездә каләмнәрен чарлап, әдәбият дөньясына юл ярган. Фән дөньясында киң танылу алган Илдар Низамов, филология фәннәре докторы Марсель Бакиров, соңрак “Ватаным Татарстан”да баш мөхәррир булып хезмәт куйган Мөнир Әһлиуллин да – безнең редакциядә чыныгу алган кешеләр. Хәтта ки театр дөньясында танылу алган Зинира Атнабаева да бездә корректор булып эшләгән. Г. Камал театрында чыгышы белән Башкортстаннан булган артистлар белән дә без һәрвакыт горурландык һәм горурланабыз. Алдагы көннәрдә дә ике тугандаш республика арасындагы дустанә мөнәсәбәтләр яшәячәгенә, тагын да ныгуына ышанам, – диде Фаил Камил улы.
Арытаба очрашуга килгән мәртәбәле кунакларыбыз һәркайсы үзе белән таныштырып узды, иҗатларында, тормышларында булган кызыклы вакыйгалар, хатирәләр белән уртаклашты. Бер үк вакытта журналистларның сорауларына да ихлас җавап бирде.
– Очрашуга чакыруыгыз өчен зур рәхмәт. Без Башкортстанга гастрольләр белән килгәндә һәрвакыт дулкынланабыз, чөнки монда зәвыклы, ихлас тамашачы. Ә инде ике республика арасында дуслык җепләренең ныклы булуына шигебез дә юк, чөнки ул һәрвакыт нык булды һәм булачак та, – диде Русиянең атказанган, Татарстанның халык артисты Илдар Хәйруллин.
Әйткәндәй, хезмәттәшләре аның “театрның алтын баганаларының берсе” булуы хакында әйтеп узды.
Татарстанның халык артисты Әсхәт Хисмәтов, театрда хезмәт итүдән тыш, телевизион фильмнарда төшүнең нечкәлекләре турында да сөйләде. Журналистлар да аңа нәкъ шушы хакта сорау биргән иде.
– Пандемиягә кадәр Уфага гастрольләр белән җәй айларында килдек. Бу инде икеләтә рәхәт вакыт була иде, чөнки гастрольләр аншлаг белән бара, дуслар белән очрашабыз, Агыйделдә су коенабыз. Тик менә бу афәт күп нәрсәне үзгәртергә мәҗбүр итте. Шуңа да Уфа тамашачысы белән янә очрашуыбызга чиксез шатмын.
Мин бик күп телевизион фильмнарда төшсәм дә, иң беренче чиратта театр артисты булып калам. Әлбәттә, театр белән кинога төшү — икесе ике нәрсә. Мәсәлән, спектакльдә бирелгән ролемнең сүзләрен мин репетиция вакытларында озак кына ятлый алам. Ә телевизион фильмда төшкәндә эш бөтенләй башкача бара. Монда текстны төшерү мәйданчыгына баргач бирәләр дә, син аны шунда ук ятлап, рольгә кереп, уйнарга да тиешсең. Катлаулы һәм кызыклы процесс килеп чыга. Тагын, нинди дә булса эшкә алынгансың икән, аны җиренә җиткереп башкарып чыгарга тиешсең, – диде Әсхәт Әсәдулла улы.
Г. Тукай исемендәге Татарстан дәүләт, Муса Җәлил исемендәге республика премияләре лауреаты, Русиянең атказанган, Татарстанның халык артисты Илдус Әхмәтҗанов редакциядәге 2008 елгы очрашуда да булган.
– “Кызыл таң” редакциясендә соңгы очрашудан соң шактый гомер узган икән шул. Мин Уфага теләп киләм, чөнки монда үзенчәлекле тамашачы. Башкортстанлылар таләпчән, театр сәнгатен аңлап бәя бирүчеләр. Бәлки, моның сәбәбе тарихка да барып бәйләнәдер. Ни дисәң дә, явыз Иван Татарстан җирләрен басып алып, татарларны чукындыра башлагач, алар арасындагы иң хәллеләре, акыллы, тәвәккәл һәм максатчаннарының күбесе Башкортстанга күчеп китәргә мәҗбүр булган. Менә шушы сыйфатлар буыннан-буынга күчеп, әле дә саклана, минемчә, – диде Илдус әфәнде.
Аннан соң ул “Без китәбез, сез каласыз” спектакленнән “Тукай” монологын очрашуга килгән һәркемнең йөрәкләрен җилкендереп, күңел түренә үтеп керердәй һәм уйландырырдай итеп укып ишеттерде.
Татарстанның халык артисты Илсөя Төхвәтуллина үзенең туган ягы булган Апас районы Дәвеш авылының да искиткеч матур табигать кочагында урнашканын һәм Башкортстанныкына охшашлыгын ассызыклады.
– Бәлки, үзем дә, табигать кочагында үскән бала буларак, романтизм рухы көчле булган Уфа тамашачысының да самимилеген, гадилеген тоямдыр һәм һәрвакыт сагынып киләм. Мин үзем Уфадагы гастрольләрнең берсенә “Зәңгәр шәл”дәге “Мәйсәрә” роле белән килгән идем. Менә нәкъ шул килүебездә Марсель абый Сәлимҗанов куйган “Зәңгәр шәл”нең яңа вариантын Башкортстан телевидениесе төшереп алды. Шулай килеп чыкты инде, ул спектакльнең телевизион варианты безнең үзебездә юк. Менә шушы зур эшне башкарып чыкканнары өчен мин БСТга тагын бер кабат рәхмәт сүзләрен әйтәсем килә, чөнки миңа ул язма бик тә кадерле.
“Театр – тормышның көзгесе” дигән гыйбарә бар. Минемчә, гәзит редакциясе дә – ул тормышның көзгесе. Каләмегез очлы, нык, көчле һәм иҗади уңышлар юлдаш булсын! – диде Илсөя Төхвәтуллина.
Татарстанның атказанган артисты, Муса Җәлил исемендәге республика премиясе лауреаты Илнур Закиров Уфа шәһәре, Башкортстан белән студент елларыннан ук танышлыгын әйтте.
– Минем Уфага беренче гастролем 2005 елда булганын хәтерлим. Курсташларым арасында да башкортстанлылар бар иде. Алар арасындагыларның берсе – “Нур” театры артисты Чулпан Раянова. Сез аны күбегез Зифа Кадыйрованың әсәре буенча куелган Фатыйма роле аша беләсез. Мин аның иҗаты белән танышып барам һәм уңышларына шатланам, горурланам. Дусларым, шулай ук, М. Гафури театрында эшләүчеләр арасында да бар, – диде Илнур Закиров һәм, Һади Такташның шигырен сәнгатьле итеп сөйләп, күңелләрне хушландырды.
Бу очрашуда Камал театрының фотографы Рифкать Якупов та бар иде. Ул республикабызда гына түгел, ә бөтен Русия киңлекләрендә киң танылу алган фотограф Рамил Килмәмәтов белән иҗатташ дуслыклары хакында бәян итте. Әйткәндәй, урыс мохитендә үскән Рифкать абый театрга эшкә килгәч кенә татар телен өйрәнүен әйтте.
– Спектакльләрдә һәм аларның репетиция барышларында сүзләрне аңлап, хәтеремдә калдырырга тырыштым. Ә инде мәгънәсен аңламаган очракта, сүзлектән карап белдем, һәм инде бүген мин туган телемдә иркен аралашам. Театр кешеләрне һәрьяклап яхшы якка гына үзгәртә, – диде ул.
Матур, җылы, эчтәлекле очрашуның истәлеге итеп, кунакларга “Кызыл таң” гәзитенең энциклопедиясе бүләк ителде һәм киләсе гастрольләрдә дә очрашырга сүз бирелде.

Зөһрә ИСЛАМОВА.

Автор:Зөһрә Исламова

Читайте нас:

Новости партнеров

Ҡыш ҡасан килә?

Уфимский лимонарий – точка притяжения туристов со всех концов России

Балтачлар аккошлар гаиләсе өчен борчыла

Теркәлү саны: 2019 елның 24 маендагы Эл сериясе № ФС 77-75682.

Басманың яшь категориясе 12+

___________________

Сетевое издание «KizilTan» зарегистрировано Федеральной службой по надзору в сфере связи, информационных технологий и массовых коммуникаций (РОСКОМНАДЗОР)

Регистрационный номер: серия Эл № ФС 77-75682 от 24 мая 2019 г.

Возрастная категория издания 12+

Гамәлгә куючылары: Башкортстан Республикасы Матбугат һәм киңкүләм мәгълүмат чаралары агентлыгы, Башкортстан Республикасының “Республика Башкортостан” Нәшрият йорты дәүләт унитар предприятиесе.

____________________

УЧРЕДИТЕЛИ: Агентство по печати и средствам массовой информации Республики Башкортостан, Государственное унитарное предприятие Республики Башкортостан Издательский дом «Республика Башкортостан».

Баш мөхәррир Фаил Камил улы Фәтхетдинов.

Кабул итү бүлмәсе телефоны: 8 (347) 272-13-61.

___________________

Главный редактор: Фатхтдинов Фаил Камилович.

Телефон приемной: (347) 272-13-61.

Телефон

8(347)272-13-61

Электрон почта

kyzyltan@mail.ru

Адресы

450079, Уфа шәһәре, Октябрьнең 50 еллыгы урамы, 13 нче йорт

Реклама хезмәте

8(347)272-62-27

Хезмәттәшлек

8(347)272-62-27