+20 °С
Болытлы
Мәдәният һәм сәнгать
21 гыйнвар 2023, 09:15
Казанда Нәкый Исәнбәткә багышланган китапны тәкъдим иттеләр
Тинчурин театрында Нәкый Исәнбәткә багышланган китапның презентациясе узды.
Казанда Нәкый Исәнбәткә багышланган китапны тәкъдим иттеләр
Нәкый Исәнбәт (чын исеме Нәкый Сираҗетдин улы Закиров) - күренекле татар язучысы, шагыйрь, драматург, галим-филолог һәм фольклорчы, Г. Тукай исемендәге дәүләт премиясе лауреаты һәм Татарстанның халык язучысы. Ул күренекле якташыбыз да - Башкортстанның Салават районы Малаяз авылында Сираҗетдин мулла һәм Таибә абыстай гаиләсендә туган.
Күренекле галим, Татарстанның халык язучысы, “Идегәй” дастанын беренче булып бастырып чыгарган Нәкый Исәнбәткә багышланган һәм “Җыен” фонды тарафыннан нәшер ителгән китапны Тинчурин театрында 20 гыйнварда тәкъдим иттеләр. “Син сазыңны уйнадың” дип аталган әлеге чара “Идегәй” татар халык дастаны буенча куелган спектакльгә багышланды.
“Җыен” фондының “Шәхесләребез” сериясендә басылып чыккан китапны тәкъдим итүдә язучылар, галимнәр, театр белгечләре, артистлар һәм К. Тинчурин театры актерлары катнашты. Китапны басмага филология фәннәре кандидаты Миләүшә Хәбетдинова әзерләгән. К. Тинчурин театры чараны Татарстан Мәдәният министрлыгы, “Җыен” фонды, Татарстан Язучылар берлеге һәм Казан федераль университетының Г. Тукай исемендәге Милли мәдәният һәм мәгариф югары мәктәбе белән берлектә оештырды.
Театрның баш режиссеры Туфан Имаметдинов сәхнәләштергән “Идегәй” спектакле премьерасы 26-27 гыйнварда узачак. Ул “Идегәй”не сәхнәгә куярга алынуын әсәрнең милли, әдәби, тарихи актуальлеге белән аңлата. Театр моңарчы “Хуҗа Насретдин”, “Итил суы ака торур”, “Кураж ана” кебек тарихи әсәрләр куеп, зур чыныгу узды. Тинчурин театрында төрле елларда Н. Исәнбәтнең “Рәйхан”, “Хуҗа Насретдин” әсәрләре, аның тәрҗемәсендә “Гамлет” пьесасы куелды. Театр актерлары Илгизәр Хәсәнов, Алмаз Фәтхуллин, Лилия Мәхмүтова, Харис Хөснетдинов әлеге чарада “Хуҗа Насретдин” спектакленнән бер өзек тә уйнап күрсәтте, Артем Пискунов “Гамлет”тан монолог сөйләде.
Бәйрәмне Тинчурин театры актрисасы Резедә Сәләхова алып барды. Казан театр училищесы студентлары Н. Исәнбәтнең “Тукай остаз”, “Гыйсьян җыры”, “Әбүгалисина” шигырьләрен башкарды. Халыкара конкурслар лауреаты, Н. Җиһанов исемендәге Казан консерваториясе укытучысы Сөмбел Кыямова “Син сазыңны уйнадың” җырын, “Түләк” операсыннан Сусылу ариясен башкарды. Театрның Ильяс Камал җитәкчелегендәге камера оркестры музыкаль әсәрләр белән сөендерде.
Тинчурин театры директоры, Татарстанның атказанган мәдәният хезмәткәре Фәнис Мөсәгыйтов һәм баш режиссер Туфан Имаметдинов, чарага килгән тамашачыларны сәламләп, Нәкый Исәнбәтнең тормышы, иҗаты белән кызыксынулары өчен рәхмәт белдерделәр, аларны тиздән булачак “Идегәй” премьерасына чакырдылар.
Чарада Татарстанның халык шагыйре, Тукай премиясе иясе, китапның җаваплы мөхәррире Разил Вәлиев чыгыш ясады. Шулай ук Татарстанның һәм Русиянең халык артисты Әзһәр Шакиров сүз алды. Татарстан Дәүләт Советы депутаты, Татарстанның халык артисты Рамил Төхвәтуллин, Бөтендөнья татар конгрессы вәкиле Ләйсән Исхакова, КФУ профессоры Марсель Бакиров, театр белгече, галим Әлфәт Закирҗанов, Татарстанның халык шагыйре, Тукай премиясе иясе Рәдиф Гаташ, Татарстанның халык язучысы Рабит Батулла, галимә Фәнзилә Җәүһәрова, Татарстан Фәннәр академиясенең Шиһабетдин Мәрҗани исемендәге Тарих институтының Миркасыйм Госманов исемендәге Алтын Урда һәм татар ханлыкларын тикшеренүләр үзәге җитәкчесе, тарих фәннәре кандидаты Илнур Миргалиев чыгыш ясадылар.
Нәкый Исәнбәт турында “Җидегәннән төшкән нур” дигән әдәби әсәрнең авторы, язучы Рафис Корбан да фикерләре белән уртаклашты. Филология фәннәре кандидаты, Салават Юлаев премиясе лауреаты, З. Исмәгыйлев исемендәге Сәнгать институты доценты Гөлчәчәк Саламатова чарада катнашучыларны видеоязма аша сәламләде.
“Идегәй” спектакле премьерасы уңаеннан Тинчурин театры музее җитәкчесе, Татарстанның атказанган мәдәният хезмәткәре Розалия Чабатова дастанга һәм “Идегәй” әсәрен беренче булып бастырып чыгарган әдип, Татарстанның халык язучысы Нәкый Исәнбәткә, аның К. Тинчурин театры белән хезмәттәшлегенә багышланган күргәзмә әзерләгән иде. “Татар-информ” мәгълүмат агентлыгы “Син сазыңны уйнадың” чарасын туры эфирда күрсәтте.
Бу хакта К. Тинчурин театры матбугат үзәге https://tinchurinteatr.ru/news/тинчуринда-нәкый-исәнбәткә-багышлан-2/ сайтында хәбәр итә.
Фото: ВКонтакте
