+21 °С
Болытлы
Мәдәният һәм сәнгать
6 октябрь 2023, 06:30
“Нур”да – яңа иҗат сезоны!
Театр аны Айгөл Әхмәтгалиева романы буенча куелган “Туташ” спектакле белән ачты.
“Нур”да – яңа иҗат сезоны!
Бу театрның узган сезондагы соңгы премьерасы иде. Ул, тулы заллар җыеп, уфалылар һәм шәһәр кунакларына татар театры тарихында беренче актриса буларак танылган Сәхибҗамал Гыйззәтуллина-Волжскаяның язмышы хакында бәян итте.
Сәхибҗамал Гыйззәтуллина-Волжскаяның сәхнә биографиясендә Уфа шәһәре аерым урын алып тора. Ул – милли театр сәнгатенә нигез салучыларның берсе, Уфа шәһәрендә бүгенге “Нур” татар дәүләт театрының башлангычы булып торучы профессиональ татар труппасын оештыручы да.
Сәхнә әсәре Айгөл Әхмәтгалиева романы, Гөлнур Усманова инсценировкасы буенча эшләнгән. Спектакльне сәхнәгә Башкортстанның халык артисты, Ш. Бабич исемендәге Республика яшьләр премиясе лауреаты Азат Җиһаншин чыгарды. Театраль роман жанрындагы спектакльдә театрның тулы труппасы диярлек катнаша. Өлкән яшьтәге Волжская ролен – Башкортстанның халык, Татарстанның атказанган артисты Фина Вәлиева, аның яшь чагындагы рольне Башкортстанның атказанган артисты Чулпан Раянова башкаралар.
Сезон ачылу көнендә тамашачыларны театрның фойесында балалар студиясенең татар төркемендә шөгыльләнүчеләр концерт программасы белән каршы алды. Чараны Айгөл Юлъякшина алып барды.
Аларның чыгышын караганнан соң тамашачылар залга үтте. Башкортстанның халык, Татарстанның атказанган артисты Дамира Сәетова тамашачыларны сезон ачылу белән тәбрикләде һәм спектакль карарга чакырды.
Бер истәлегендә Сәхибҗамал Гыйззәтуллина-Волжская: “Исегездән чыгармагыз мине, онытмагыз!” – дип язып калдырган. Әйе, татар халкының гына түгел, гомумән, төрки халыклар арасында беренче актриса булган Сәхибҗамал Гыйззәтуллина-Волжскаяны онытырга хакыбыз юк. “Туташ” спектакленең сәхнәгә чыгуы менә шуны исбатлый да. Ә инде өч сәгать барган спектакльдән соң да тамашачының артистларны көчле алкышларга күмүе һәм, кайтырга ашыкмыйча тамашадан алган тәэссоратлары белән уртаклашып, гәп коруы спектакльнең уңышлы булуын тагын бер тапкыр ассызыклады.
Зөһрә ИСЛАМОВА.
