+20 °С
Болытлы
Мәдәният һәм сәнгать
17 октябрь 2023, 12:05
Италия башкаласында татар һәм башкорт мәдәнияте фестивале узды
Фестиваль итальяннарны Русиянең ике республикасы — Башкортстан һәм Татарстанның колоритлы милли традицияләре белән таныштырды.
Италия башкаласында татар һәм башкорт мәдәнияте фестивале узды
Аның кысаларында өч көн дәвамында Римда Уфа, Казан, Мәскәү һәм Италия артистлары катнашлыгында концерт чыгышлары, иҗади очрашулар, фотокүргәзмәләр, яңа документаль фильм премьерасы узды. Русия Фән һәм мәдәният үзәгендә «Италия татарлары» мәдәният ассоциациясе һәм «Башкортстан-Италия» бердәмлеге фонды оештырган кичә төп вакыйга булды.
Кичә ике республикадан һәм башка төбәкләрдән чыккан кешеләрне берләштерүче "Италия татарлары" мәдәният ассоциациясенең 10 еллыгына багышланды. Әгәр бу елларда Римдагы Урыс йортында татар кичәләре күп тапкырлар уздырылса, анда башкорт мәдәнияте презентациясе беренче тапкыр үтте.
Кичәдә Халыкара һәм Бөтенрусия конкурслары лауреатлары, Миландагы музыка академиясен тәмамлаган Рәфис Хөснетдинов, Башкорт дәүләт опера һәм балет театры солисты Рим Рәхимов, Мәскәү Татар мәдәни үзәге солисты Рената Бәдамшина, шагыйрә һәм җырлар авторы Алия Солтан катнаштылар.
Урыс йортында урнаштырылган ике гадәти булмаган фотокүргәзмә: итальян фотографларының Башкортстан буенча фототурлар вакытында ясалган эшләре һәм документалист һәм фотограф Гөлназ Макиеваның «Со-творение. Рух» проекты күрсәтелде. Фестивальдә шулай ук аның "Монисто" документаль фильмы презентациясе узды, ул тәңкәләрдән хатын-кызларның күкрәк япмасы бизәнү әйберләрен ясауның борынгы сәнгатен тергезү темасына багышланган.
Традицион милли ризыклар: бал, тау үләннәреннән чәй һәм махсус заказ буенча эшләнгән һәм шәһәрнең якынлашып килүче 450 еллыгы уңаеннан Римга Уфа шәһәре хакимияте исеменнән китерелгән Башкортстан гербы белән зур чәк-чәк дегустациясе дә узды. Фестивальдә катнашучыларның иҗади очрашулары Римда шулай ук Урыс мәдәнияте һәм теле институтында узды.
Институт директоры урынбасары Леонардо Фреддуцци фикеренчә, Римда татар һәм башкорт мәдәниятләре белән танышу кичәләре кебек очрашулар Италия халкының Русия турында белемнәрен киңәйтә, мәдәни алмашуны һәм безнең илләр арасында гасырлар дәвамында барлыкка килгән гуманитар элемтәләрне сакларга ярдәм итә.
Фестиваль хакында тулырак сылтама аша белеп була.
Фото: Светлана Лисичникова
