Илсөя халык артистларын шаккатырган

Илсөя Бәдретдинованың Казандагы 6нчы концертын карарга килүчеләр арасында, тулы залда Татарстанның халык артистлары: Зөһрә Шәрифуллина, Зөфәр Хәйретдинов һәм Резидә Шәрәфиева бар иде.

Илсөя аларның һәрберсе турында җылы сүзләр әйтте. Кунаклар да җырчыга соклануын белдерде. Яңа программаны: «Карарга да матур, тыңларга дә рәхәт», - дип бәяләделәр.

«Мин Илсөянең былтыр декабрьдәге концертын карап шаккаткан идем. Быел тагын да шәбрәк. Илсөянең җырчы гына түгел, режиссер буларак талантына да сокландым. Исән-сау булып, киләсе декабрьдә дә концертка килергә насыйп булсын», – диде Зөһрә Шәрифуллина.

Композитор Зөфәр Хәйретдинов Илсөянең концертын карап, яшь җырчылар өйрәнсен иде дигән теләген җиткерде. «Илсөя шоу-бизнесның нинди булырга тиешлеген күрсәтте. Мин аңардан өйрәнер идем, тик безнең гомер узды шул», – дип уфтанды.

Илсөя: «Минем меңьеллык хыялым тормышка ашты бүген. Концертыма Резидә Шәрәфиеваның килүен бик озак көттем. Ниһаять, килде», – диде.
Резидә хезмәттәшенең концертын беренче тапкыр караган һәм сокланган. Ул Илсөя Бәдретдинованың «Едрит кудрит»ын «супер» дип бәяләде.

Фото: Гөлназ Шәйхи.
Тулырак: https://shahrichalli.ru/news/ni-khllrd/ilsoia-badretdinova-xalyk-artistlaryn-sakkattyrdy