Татар җыры яшәр, сүнмәс!

Дүртөйледә яшь башкаручыларның “Туган тел” бәйгесе үттеРеспубликаның һәр районында халкыбызның мәдәни мирасын һәм гореф-гадәтләрен саклауга, тергезүгә юнәлтелгән үзенчәлекле бренд чаралары бар. Дүртөйле районы өчен “Канатлы ат” ярышлары һәм татар җырына багышланган “Туган тел” бәйгесе – шундый күркәм чаралар исемлегендә.Дүртөйле районы хакимияте Республика халык иҗаты үзәге, Башкортстан татарлары милли-мәдәни автономиясе, Башкортстан татарлары конгрессы башкарма комитеты ярдәме белән “Туган тел” татар җырын яшь башкаручылар бәйгесен быел 16нчы тапкыр оештырды. Бу юлы ул беренче тапкыр үз канаты астына 9 яшьтән 16 яшькә кадәр җыр сөючеләрне дә кабул итте. Фестивальнең географиясе киңәеп, ул Илеш, Тәтешле, Чакмагыш, Бакалы, Бәләбәй, Кушнаренко, Яңавыл, Туймазы һәм Дүртөйле районнарыннан, Уфа, Нефтекама, Ижау, Мәләвез шәһәрләреннән генә түгел, Казахстан Республикасыннан килгән балалар һәм үсмерләрне дә җыйды, димәк, халыкара бәйге статусына ия булды.

Кунакчыл Дүртөйле җирендә ике көн гөрләде “Туган тел”. Сайлап алу этапларында да, Гала-концертта да район Мәдәният сарае тулы булды, яше-карты, илһам дөньясына чумып, җыр бәйгесен манзара кылды, яшь йолдызларны көчле алкышларга күмеп дәртләндерде. Хөкемдарлар комиссиясе рәисе – Русиянең һәм Татарстанның атказанган, Башкортстанның халык артисты Нәзифә Кадыйрова җыр бәйгесенең чагу, онытылмас тәэссоратлар бүләк итүен билгеләде.
– Балалар, үсмерләрнең шундый ихласлык, шундый сөю белән халкыбыз җырларын башкаруы туган телебезнең, моңыбызның киләчәге якты булачагына инандырды. Үсеп килүче буында мәдәниятебезгә, гореф-гадәтләребезгә мәхәббәт тәрбияләүче остазларына сәхнә түреннән рәхмәт белдерәм! – диде ул. – “Туган тел” конкурсы яңа талантларны ачыклау һәм яшьләр арасында туган телне популярлаштыру өчен менә дигән мәйданчык булып тора, бу мәдәни мирасны саклап калу өчен бик мөһим.
Гала-концерт дулкынландыргыч бәйрәм рухында узды. Яшь йолдызларның сәхнә киемнәре дә, чыгышлары да зур-зур артистларныкыннан һич калышмады, һәркайсы татар моңын, аһәңен тамашачыга түкми-чәчми җиткерергә омтылды. Халык җырларының заманча эстрада әсәрләре белән аралашып баруы да, һәр чыгышның үзенчәлекле композициягә корылуы да концертны чагу төсләр белән баетты.
Гала-концерт барышында җиңүчеләрнең исемнәре аталды, алар сәхнә түренә чакырылып, тантаналы рәвештә бүләкләнде. Башкортстан татарлары милли-мәдәни автономиясе, “Кызыл таң” исеменнән гәзитнең баш мөхәррире Фаил Фәтхетдинов, Бөтендөнья татар конгрессы яшьләр комитеты исеменнән Алмаз Хәлиуллин, Башкортстан Республикасы Дәүләт җыелышы-Корылтай депутаты, Фән, мәгариф, мәдәният, яшьләр сәясәте һәм спорт комитеты рәисе урынбасары, Башкортстан татарлары конгрессы Башкарма комитеты рәисе Заһир Хәкимов, Мәдәният министрлыгының баш белгече, шагыйрь Нурлан Ганиев яшь йолдызларны һәм тамашачыларны ихлас тәбрикләделәр. Алар “Туган тел” бәйгесен татар дөньясындагы матур, әһәмиятле вакыйга дип билгеләде, һәркемгә истәлекле бүләкләр тапшырдылар.
9-12 яшьлек башкаручылар арасында (үзешчәннәр төркемендә) беренче дәрәҗә дипломга Казахстан кунагы Азалия Хәкимова лаек булды. Икенче дәрәҗә диплом – шулай ук Казахстаннан килгән София Исмәгыйлевада. Өченче дәрәҗәдә дипломнар – Дүртөйледән Риназ Ширгазин һәм Мәләвездән Руфина Әхмәтҗановада.
9-12 яшьлек профессионал башкаручылар (музыка мәктәпләрендә белем алучылар төркемендә) беренче дәрәҗә диплом – Дүртөйледән Азамат Шәрәфетдиновта. Икенче дәрәҗә дипломны – Туймазыдан Шамил Габдуллин, өченче дәрәҗәдәгесен Яңавылдан Илнар Габдуллин алды.
13-16 яшьлек үзешчән бәйгечеләрдән беренче дәрәҗә диплом – Бакалы районыннан Данияр Заһировта, икенче дәрәҗәдәге бүләк – Илеш кызы Ленара Галиуллинада, өченче дәрәҗә дипломга Ижау шәһәреннән Азалия Касыймова лаек булды.
13-16 яшьлек профессионал башкаручылардан беренче дәрәҗә диплом – Чакмагыштан Камил Кәримовта, икенче дәрәҗәдәгесен Туймазы кызы Айгизә Галиуллина алды.
9-12 яшьтәге үзешчән башкаручылар арасында өченче дәрәҗә лауреат исемен Дүртөйле вәкилләре Азалия Муллаянова һәм Раил Ямалетдинов яулады. Икенче дәрәҗә лауреат – Илештән Вадим Валькаев. Беренче дәрәҗә лауреат шулай ук Илештән – Ленар Әсәдуллин.
9-12 яшьлек профессионал башкаручылардан җиңүчеләрнең барысы да Туймазыдан булды: беренче дәрәҗә лауреат исемен бәйгенең иң яшь җырчысы – 9 яшьлек Айдан Хәйдәров яулады. Икенче дәрәҗә лауреат дип – Анелия Биктимерова, өченче дәрәҗә лауреат дип – Айсылу Закирова танылды.
13-16 яшьлек профессионал башкаручылар арасында да Туймазы районының Кандра авылы балалар музыка мәктәбе укучылары беркемгә дә алдынгылыкны бирмәде: беренче дәрәҗә лауреат дип – Марат Әхмәтҗанов, икенче дәрәҗә лауреат дип Ралина Хөснетдинова табылды.
13-16 яшьлек үзешчәннәр арасында беренче дәрәҗә лауреат исемен Нефтекама шәһәре кызы Ренара Рәкыйпова яулады, икенче дәрәҗәдәге бүләккә – Бакалы районыннан Зарина Габдуллина, өченче дәрәҗәдәгесенә Бәләбәйдән Андрей Сидоров ия булды.
Бәйгенең Гран-приен Дүртөйле сандугачы Риана Хәлиуллина алды.
– Миңа 12 яшь, вокал белән дүрт яшемнән шөгыльләнәм, – диде ул. – Җырларга бик яратам, ни генә эшләсәм дә, моң һәрвакыт минем белән. “Җырлы шәһәр” вокал студиясендә шөгыльләнәм, остазым – Гөлнара Рифгать кызы Сәлимова. Ялгызым да, ансамбльдә дә җырлыйм, күңелемә ятышлылары – халык җырлары. Музыка мәктәбендә укыйм, саксофонда, фортепианода уйнарга өйрәнәм. Райондагы барлык чараларда, концертларда катнашам. Республика, Бөтенрусия һәм халыкара дәрәҗәдәге төрле конкурсларда дистәләгән җиңүләр яулавым иңнәремә канат куйды. Киләчәккә планнарымны, әлбәттә, җыр-моң дөньясы белән бәйлим.

Миләүшә Латыйпова,
“Кызыл таң”ның үз хәбәрчесе.
Дүртөйле районы.

Рәсемдә: легендар җырчы Нәзифә Кадыйрова белән Риана Хәлиуллина.

Автор фотосы.

Автор:Миләүшә Латыйпова

Читайте нас:

Новости партнеров

Лена ханым: "Улымды онотмайҙар"

На уровне молекул

Салкын тигәндә мунча керергә ярыймы?

Теркәлү саны: 2019 елның 24 маендагы Эл сериясе № ФС 77-75682.

Басманың яшь категориясе 12+

___________________

Сетевое издание «KizilTan» зарегистрировано Федеральной службой по надзору в сфере связи, информационных технологий и массовых коммуникаций (РОСКОМНАДЗОР)

Регистрационный номер: серия Эл № ФС 77-75682 от 24 мая 2019 г.

Возрастная категория издания 12+

Гамәлгә куючылары: Башкортстан Республикасы Матбугат һәм киңкүләм мәгълүмат чаралары агентлыгы, Башкортстан Республикасының “Республика Башкортостан” Нәшрият йорты дәүләт унитар предприятиесе.

____________________

УЧРЕДИТЕЛИ: Агентство по печати и средствам массовой информации Республики Башкортостан, Государственное унитарное предприятие Республики Башкортостан Издательский дом «Республика Башкортостан».

Баш мөхәррир Фаил Камил улы Фәтхетдинов.

Кабул итү бүлмәсе телефоны: 8 (347) 272-13-61.

___________________

Главный редактор: Фатхтдинов Фаил Камилович.

Телефон приемной: (347) 272-13-61.

Телефон

8(347)272-13-61

Электрон почта

kyzyltan@mail.ru

Адресы

450079, Уфа шәһәре, Октябрьнең 50 еллыгы урамы, 13 нче йорт

Реклама хезмәте

8(347)272-62-27

Хезмәттәшлек

8(347)272-62-27