Күрдем чишмәләре саекмас!

Ел саен барып, карап, шатланып, тирән бер сөенеч кичереп кайта торган бәйрәм ул “Күрдем чишмәләре” фестивале. Чөнки сәхнәләрдән Әнгам Атнабаевның җырлары, шигырьләре яңгыраганда күңел шатлана, шагыйрьнең вафатыннан соң да аларны башкаручыларның күп булуына, алай гына да түгел – елдан-ел артуына сөенәсең. Быел да ул йөзгә якын катнашучыны берләштерде, республикада һәм күрше төбәкләрдә яшәүче иҗат сөючеләрне бер сәхнәгә җыйды.

Конкурста катнашырга быел гариза биргән 87 кеше­нең 26сы икенче турга узган иде. Катнашучыларның иң кечкенәсенә 6 яшь, иң өлкәне җитмешне узган. Атнабай шигырьләре “тәмле” шул, аны балалар да, өлкәннәр дә бердәй яратып сөйли. Менә Шулган авылыннан Илгиз Гәрәйшин “Кәҗә белән сарык” шигырен шундый сәнгатьле итеп укый – торганы бер артист! Искәндәр Исламов та “Ул болытлар юктыр инде”не сөйләгәндә зал аны алкышларга күмде – балаларның матур итеп туган телдә сөйләве күңелгә май булып ята. Балтач районыннан Рания Галиева, Тәтешледән Тимур Мәхмүтов, Риана Хәкимҗанова, Күрдем­нән Аиша Шәмсетдинова, Азалия Нигъмәтуллинаның сән­гатьле укулары аеруча күңелдә уелып калды. Балалар арасындагы номинациядә беренче урынга Искәндәр Исламов һәм Рания Галиева лаек булдылар.
Шигырь сөйләүче өлкәннәр арасында исә Нурсилә Гыйлемшинага тиңнәр булмагандыр, ул шагыйрьнең “Син түгелме?” шигырен искиткеч сәнгатьле итеп башкарды һәм өлкән башкаручылар арасында беренче урынга лаек булды. Әйткәндәй, бу шигырь конкурсантлар арасында бик популяр, аны сәхнәгә алып чыгучылар бик күп булды, икенче урынга лаек булган Наилә Шәфыйкова да шул ук шигырь белән чыгыш ясады. Яңавыл шәһәреннән Зиләрә Даутова, “Яшьлек белән очрашу” поэмасыннан өзек сөйләп, өченче урынны алды.

Җырчылар арасында исә балалар номинациясендә Быргынбаш авылы оныгы (Нефтекама кызы) Элиза Карамовага тиңнәр булмады. Ул шагыйрьнең “Туган җирем” җырын башкарып, беренче урын яулады. Икенче урынга шул ук җырны әзерләгән Гүзәл Сафина чыкты, өченче урында – Гаяз Сафин. Ул ша­гыйрьнең “Егетләр солдаттан кайталар” җырын башкарды.
Өлкәннәр арасында җыр конкурсында Гран-прига Нефтекама шәһәренең “Чулпан” фольклор ансамбле лаек булды (җитәкчесе – Ч. Гафур­җанова). Ансамбль Ә. Атна­баевның “Очрашкан юк” җы­рын әзерләп алып килгән иде. Зинүнә Янмурдина, Рима Таһирова, Юлия Сәгадиева башкаруында бу җыр тамашачы сөюен яулады һәм жюри тарафыннан югары бәя алды. Югары Кодаш авылыннан Алсу Кәримова һәм Илзидә Галиуллина дуэты “Дусла­рыңны онытма” җыры белән беренче урынга чыкты. Икенче урынны Нефтекама Милли-мәдәни үзәгеннән Данил Хуҗин алды. Ул исә бәй­рәмдә Ә. Атнабаев сүзләренә үзе язган “Ак яулык” җыры белән чыгыш ясады. Өченче урында – Күрдем авылыннан “Алтынай” төркеме.

Тамашачы һәрвакыт көтеп алган номинация – авторлар арасында үтә торган бәйге. Бу юлы өченче урынга Татар­станның Лаеш районыннан килгән Эльвира Абдуллина-Байгазина, икенче урынга Гәрәбаш авылыннан Рима Нургалиева чыктылар. Беренче урында – Нефтекама шәһә­реннән яшь каләм тибрәтүче Дилбәр Исраева. Ә инде Гран-прига Йосып авылыннан Миләүшә Әхмәтова лаек булды! Ул тамашачыларга “Билгесезлек авыр унлата” дигән һәм “Гашыйк итеп күпме кызларны” дигән шигырьләрен укып ишеттерде.
Конкурсантларны мәртәбә­ле жюри – җырчы­лар, композиторлар, нәфис сүз осталары, журналистлар бәяләде. Кат­нашу­чыларның һәрберсе дипломнарга, оештыручылар тарафыннан әзер­ләнгән кыйм­мәтле бүләкләргә лаек булды. Шулай ук, һәр елдагыча, Ә. Атнабаев исемен­дәге премия лауреатлары Мәгъдән Атнабаев, Лиза Фәтхуллина, Күр­дем авылы биләмәсе хакимияте, Күрдем китапханәсе, К. Маркс исе­мендәге авыл хуҗа­лыгы кооперативы әзер­ләгән махсус призлар да үз хуҗа­ларын тапты.

Кичә ахырында иң дулкынландыргыч мәлләр җитте. Быел Әнгам Атнабаев пре­миясенә Русиянең һәм Баш­кортстанның Язучылар һәм Журналистлар бер­лекләре әгъзасы, Башкорт­станның атказанган мәдәният хезмәткәре Факил Морзакаев, Әнгам Атнабаев иҗатын пропагандалауга зур өлеш кер­түче, “Кызыл таң” гәзите хәбәр­чесе, Русиянең һәм Баш­корт­стан­ның Журналистлар берлек­ләре әгъзасы Гөлнара Гыйлемханова лаек булдылар. Барлык гәзит укучылар исе­меннән лауреатларны лаеклы бүләкләре белән котлыйбыз!
Узган ел ахырында “Атнабайдан тапкыр сүз” дигән китап чыгарган Факил Салих улы тәтешлеләргә мондый югары исем өчен рәхмәт белдерде. Гөлнара Рәшит кызы райондашларын Тәтешленең 90 еллыгы һәм “Күрдем чишмәләре” фестивале белән ихластан котлады һәм иҗатташ дуслары белән бергә әзерләп алып кайткан концерт номерын бүләк итте.
Яңа талантлар ачкан, яңа лауреатлар бүләк иткән конкурс тәмам. Алдагы очрашуларны, алдагы фестивальне көтеп калабыз!

Гөлнара Гамилова.
Тәтешле районы.