+20 °С
Болытлы
Мәдәният һәм сәнгать
11 март 2025, 06:15
Түш кесәгә салып йөртерлек китап!
Уфа “Нур” татар дәүләт театрында Башкортстанның халык шагыйре Әнгам Атнабаевка багышланган чаралар үтте
Түш кесәгә салып йөртерлек китап!
Театрда Ватанны саклаучылар көне, Башкортстанның халык шагыйре Әнгам Атнабаевның туган көне һәм Факил Морзакаевның “Атнабайдан хикмәтле сүз” һәм “Атнабайҙан тапҡыр һүҙ” дигән китапларын тәкъдир итү булды. Китапларның төзүчесе – Башкортстанның атказанган мәдәният хезмәткәре, Һәдия Дәүләтшина, Мифтахетдин Акмулла, Әнгам Атнабаев исемендәге премияләр лауреаты, күренекле журналист, прозаик һәм тәрҗемәче Факил Морзакаев.
Аерым темаларга багышланган афоризмнар, әйтем-мәкальләр, фактлар тупланмалары бастыру – Факил Морзакаев эшчәнлегендә мөһим юнәлешләрнең берсе. Моңа кадәр авторның “Батыр хакында сүз” (анда Салават Юлаевның тормыш һәм яу юллары, иҗаты турында галимнәр һәм әдипләрнең тирән мәгънәле, фәһемле фикерләре тупланган), “Фәһемле фикерләр дөньясында” җыентыклары дөнья күрде. “Икмәк кадере” дигән җыентыкка төрле чыганаклардан алынган тирән мәгънәле фикерләр, мәкаләләр, әйтемнәр, шигъри юллар тупланган. Ә инде бу кичтә тәкъдир ителгәннәренә Әнгам Атнабаевның җор фикерләре, афоризмлары тупланган.
Спектакль алдыннан театрның фойесында “Нур” театры артистлары әзерләгән әдәби-музыкаль тамаша булды: шагыйрьнең шигырьләре, аның сүзләренә җырлар яңгырады. Үзләренең җыр-моңнары белән Башкортстан татар хатын-кызларының “Сәхибҗамал” оешмасы вәкилләре дә тамашачыны сөендереп, чарага ямь өстәде.
– Башкортстанның халык шагыйре Әнгам Атнабаев шигъриятнең солтаны булды. Без аның шигырьләрен яттан сөйләдек, үзе белән очрашу кичәләрен көтеп ала идек. Ә инде автографын алу зур бәхеткә тиң иде. Башкортстан китап нәшриятында эшләгәндә миңа Әнгам абый белән тыгыз хезмәттәшлек итү бәхете дә тиде. Мөхәррир буларак, аның “Җиз кыңгырау моңнары” китабын бергәләп чыгарырга насыйп булды. Ул аның 70 яшьлек юбилеена багышланган басма иде. Ул аны шатланып кабул итте. Автор үзе “Динә җан! Яшәсен иҗади дуслыгыбыз!” дип язып бүләк иткән китап – иң кадерле ядкәрләрнең берсе. Ул китап шагыйрьнең үзе исән чагында татар телендә чыккан бердәнбер китап булып тарихта калды.
Ә инде чирек гасыр узгач, иҗади дуслыгыбызның дәвамы буларак, “Атнабайдан хикмәтле сүз” һәм “Атнабайҙан тапҡыр һүҙ” китаплары дөнья күрде. Бүген шушы китаплар тәкъдир ителә. Аларда Әнгам Атнабаевның афоризмнары, җор фикерләре тупланды. Китаплар шагыйрьнең бертуган энесе Мәгъдән абый ярдәме белән дөнья күрде, ул сувенир – кесә китабы форматында чыкты. Атнабайның бер шигырендә шундый юллар бар: “Түш кесәгә салып йөртәсе бар үзебезнең туган туфракны”. Бүген тәкъдир ителгән китаплар да түш кесәгә салып, йөрәк түрендә генә йөртерлек. Бу китаплар республика китапханәләренә таратылды, күптән түгел узган “Күрдем чишмәләре” бәйгесендә катнашучыларга бүләккә бирелде. Әнгам Атнабайның иҗаты озак еллар яшәсен! – диде китапның мөхәррире, нәшрият ветераны Динә Морзакаева.
– Әнгам Атнабаев иҗаты һәркайсыбызның күңел түрендә яши. Аның шигърияте, драматургиясе бүген дә актуаль һәм үзенә җәлеп итә. Соңгы елларда аның иҗатына багышланган китаплар бер-бер артлы басылып тора, китап туйлары зурлап үткәрелә. Бүген дә шундый күркәм чарадабыз. Бу инде Әнгам Атнабаевның чын халык шагыйре икәнлеген тагын бер тапкыр ассызыклый. Киләчәктә дә аның иҗатын барлыйк, зурлыйк, бөек шагыйребезнең иҗатын киләчәк буыннарга тапшырыйк, – диде Башкортстан Язучылар берлегенең татар әдипләре берләшмәсе җитәкчесе Руслан Сөләйманов.
“Сез белмәгән Атнабай” китабының җаваплы мөхәррире – филология фәннәре кандидаты, Башкортстан татарлары Милли-мәдәни автономиясенең башкаручы директоры Альбина Хәлиуллина, язучы, галим, әдәби тәнкыйтьче, филология фәннәре докторы, профессор, Әнгам Атнабаев исемендәге премия лауреаты Рәиф Әмиров, Бөтендөнья татар конгрессының Башкортстандагы вәкиллеге җитәкчесе Альфред Дәүләтшин чыгышларында Әнгам Атнабаев иҗатының мәңгелек икәнен ассызыкладылар.
Спектакль алдыннан сәхнәгә танылган журналист, язучы Факил Морзакаев чыгып, тамашачыларны янә китаплары белән таныштырды.
Бу көнне “Нур”га тәтешлелеләр дә килгән иде. Әнгам Атнабаевның бертуган энесе Мәгъдән абый, район хакимияте вәкилләре һәм СВОда катнашучы ир-егетләрнең әниләре, хатыннары чакырылган иде. Тәтешлелеләр, “Нур” театры җитәкчелегенә бүләкләр, күчтәнәчләр тапшырып, Әнгам Атнабаевның иҗатын саклауга зур өлеш керткән өчен рәхмәт сүзләре җиткерде.
Ә инде бәйрәмнең өченче өлешендә тамашачы Әнгам Атнабаевның классик әсәргә әверелгән “Ул кайтты” спектаклен карады. Тамаша ахырында тамашачылар, күз яшьләрен сөртә-сөртә, артистларны көчле алкышларга күмде.
Зөһрә ИСЛАМОВА.
