Ландыш та Мәскәүне яулый

"- Тапшырудагы мохитне сөйләсәгез иде. Съемкалар ничегрәк узды?

- Барысы да бик оешкан төстә үтте. Тапшыруны бер дә бүленмичә, туктамыйча, ничек утырасың, шулай төшерәләр. 2 сәгатьлек тапшыру әзерләү өчен съемкалар 3,5 сәгать тирәсе барды. Студиядә шундый җылы, рәхәт мохит иде. Тапшыру кысаларында «Вояж» җырын татарча башкардым. Җырны татарчага тәрҗемә иткән автор Айдар Минһаҗев белән дә элемтәгә керделәр.

Җырладык, биедек, җиңелчә генә әңгәмәләр кордык.

- Татар эстрадасы турында да сорашканнардыр әле, бәлки?

 - Юк, андый сораулар бирмәделәр. Мине «Казаннан килгән кунак» дип таныштырдылар. Татар җырчысы, 4 бала әнисе булуымны билгеләп үттеләр. Андрей Малахов: «Исемегез матур. Кем кушты, кем хөрмәтенә?» – дип комплимент ясады (көлә). Сәхнәгә кайчан чыгуыбыз, иҗатыбыз турында сораулар булмады. Төп шул 80-90 нчы еллардагы хитлар турында сөйләштек",  - дигән Ландыш.

Хәзер җырчы белән кызыксынучылар «Привет, Андрей» тапшыруы чыкканын түземсезлек белән көтә. Төгәл вакыты әлегә билгеле түгел. Үзләре хәбәр итәчәкләр. 1 атна да, берничә ай вакыт та узарга мөмкин икән.

Тулырак: https://intertat.tatar/news/landys-nigmatanova-andrei-malaxov-isemegez-matur-dip-kompliment-yasady-5875583