+21 °С
Болытлы
Мәдәният һәм сәнгать
24 октябрь 2025, 05:20
“Бу дөньяның иң матур төбәге – Илештер!”
Районнарда яшәп иҗат итүчеләр белән Башкортстан Язучылар берлегендә очрашулар дәвам итә
“Бу дөньяның иң матур төбәге – Илештер!”
Илеш районының Ринат Хәйри исемендәге “Балкыш” әдәби берләшмәсе әгъзалары Язучылар йортында кунакта булды. Бу берләшмә 1980 елда республикабызның Г. Сәләм исемендәге премиясе лауреаты Ринат Хәйри тарафыннан “Ләйсән” исеме астында эш башлый. “Балкыш”ның әлеге җитәкчесе – Башкортстанның Язучылар берлеге әгъзасы Гөлфинә Сәлимова. Берләшмә җитәкчесе үз чыгышында “Балкыш”ның тарихы, бүгенге эшчәнлеге белән таныштырды.
Илеш иҗатчыларының әдәби-музыкаль программасы җыр-моң белән үрелеп барды. Әдәби берләшмә әгъзалары бер-бер артлы мәйдан тотты, үзләренең иҗат җимешләрен тәкъдим итте. Берләшмә әгъзалары булган шагыйрьләрнең сүзләренә иҗат ителгән җырлар да яңгырады. Башкортстанның халык артисты, виртуоз баянчы Фирдус Шәрәфуллин, танылган җырчы Зилә Мусина, Уфа “Нур” татар дәүләт театры актрисасы, Башкортстанның халык, Татарстанның атказанган артисты Дамира Сәетова, Башкортстанның атказанган артисты Фирзинә Абдуллина, Мәгафур Хисмәтуллин исемендәге “Башкорт сандугачы” конкурсы лауреаты Илгиз Әхмәтшин, Базытамак урта гомуми белем бирү мәктәбенең татар теле һәм әдәбияты укытучысы Илмера Ахунова чыгышлары җылы каршы алынып, алкышларга күмелде.
“Балкыш” әдәби берләшмәсенең иң актив әгъзаларының берсе Рәлиф Шәгалиевның Ришат Абдуллинның гармунда уйнавына кушылып моңлы җырлавы, “балкыш”лыларның үзләренең гимнын башкаруы ямь өстенә ямь булды. Чарада Илеш районының мәктәп укучылары – яшь иҗатчылар да катнашып, аны тагын да бизәде.
“Балкыш” әдәби-иҗат берләшмәсендә хәзерге көндә унөч кеше исәпләнә: алар – Гөлфинә Сәлимова, Мөнәвис Низами, Радик Мөслыхов, Рәлиф Шәгали, Рита Солтанова, Рәзиф Галиев, Мәрьям Шәмсиева, Әлфира Сәетгәрәева, Анфиса Шәемова, Радик Зыязов, Фәвәрис Әгълетдинов, Флүсә Нәбиева, Фәрәһия Гыйльмиханова. Тамашачылар аларның иҗат җимешләре белән күргәзмәгә куелган китаплар аша да таныша алды.
Чараны оста итеп алып баручы Мәрьям Шәмсиева, һәр иҗатчы белән якыннан таныштырып, һәркайсына сүз бирде. Ә инде педагогик хезмәт ветераны, РСФСРның мәгариф отличнигы Фәнә апа Минһаҗеваның чыгышы аеруча күңелгә якын булды. Ул, үзенең шигырьләрен яттан сәнгатьле итеп сөйләп, көчле алкышларга күмелде.
Әдәби очрашуда Башкортстанның Язучылар берлеге җитәкчесе Айгиз Баймөхәммәтов, аның урынбасары Тәнзилә Дәүләтбирдина, Татар әдипләре берләшмәсе әгъзалары, журналистлар, студентлар катнашты. Чара Илеш районы хакимияте, Башкортстан Язучылар берлеге ярдәме белән оештырылды.
Язучылар берлеге җитәкчесе Айгиз Баймөхәммәтов әдәбиятыбызны пропагандалауга зур өлеш керткәне өчен Илеш районы хакимиятенең мәдәният бүлеге җитәкчесе Рөстәм Әхмәдиевка, “Балкыш” берләшмәсенең актив әгъзасы Мәрьям Шәмсиевага, Базытамак урта гомуми белем бирү мәктәбенең татар теле һәм әдәбияты укытучысы Илмера Ахуновага Башкортстан Язучылар берлегенең Рәхмәт хатын тапшырды.
Илешлеләр дә буш кул белән килмәгән иде: алар туган җирләренең күпереп пешкән икмәге, бавырсагы белән сыйлады, бүләкләр өләште.
Очрашу, Илеш районы иҗатчыларының мәйдан тоту урыны гына булып калмыйча, якташларның очрашу урынына да әверелде.
Ә инде әлеге чара “балкыш”лыларның илһам канатларын тагын да ныгытып, аларның һәркайсын иҗат ялкынында балкып януга дәртләндерер.
Зөһрә ИСЛАМОВА.
