+28 °С
Болытлы
Рәзинә Мөхияр (Мөхиярова Рәзинә Хәйбрахман кызы) – галимә, шагыйрә. Чакмагыш районының Аблай авылында туып үскән. Башкорт дәүләт университетын тәмамлаганнан соң, башта мәктәптә, аннан соң утыз елга якын Чаллы дәүләт педагогия университетында укыта. Монографияләр, дәреслекләр, методик һәм уку кулланмалары, ун шигъри җыентык авторы, Саҗидә Сөләйманова исемендәге әдәби премия лауреаты. Яр Чаллыда яши.
ЯТИМЛЕКЛӘР
Ятимлекләр булган, бар, булачак,
Ятимлекләр – әрем әчесе.
Ятимлекне тоеп, кемдер шулай
Ятим булып җирдә яшисе.
Бөек Тукай яшьтән ятим калган,
Милләт сөеп, карап үстергән.
Тәрбиягә алган һәммә кеше
Карендәшем, диеп, үз күргән.
Ана назын тоймаса да шагыйрь,
Теле, дине аша назланган.
Ятимлекнең әче сагышларын
Туган теле белән язалган.
Аллаһ биргән тел дә кысрыклана,
Үз дәүләтең гөрләп тормагач.
Тукайлар да тумый үлеп кала,
Милли моңнар җанда булмагач.
Рәзинә МӨХИЯР.
Кадерде дуслар!
Әгәр сез бу авторның әлеге бәйгедә алга чыгуын телисез икән, көн саен сайтка кереп, шигырен укып чыгыгыз. Аларның күпме караулар җыюына сылтанып, без җиңүчене билгеләрбез. "ВКонтакте", "Одноклассники" сайтларында "Кызыл таң" төркеменә дә күз салыгыз, әлеге материалны үзегезнең сәхифәгә алып куегыз.
Бәйләнеш өчен ватсап: 8 917 472 58 54.
Фото: гаилә архивыннан.
