+20 °С
Болытлы
Милләт
26 февраль 2021, 20:10
"Барлык халыклар республиканы туган йорты итеп тойсын!"
Бүген Уфаның "Башкортостан" дәүләт концерт залында “Башкортстан Республикасы татарларының милли-мәдәни автономиясе” төбәк иҗтимагый оешмасының V отчет-сайлау конференциясе узды.
Бүген Уфаның "Башкортостан" дәүләт концерт залында “Башкортстан Республикасы татарларының милли-мәдәни автономиясе” төбәк иҗтимагый оешмасының V отчет-сайлау конференциясе узды.
Бүген "Башкортстан Республикасы татарларының милли-мәдәни автономиясе” төбәк иҗтимагый оешмасының V отчет-сайлау конференциясендә Хөкүмәт вице-премьеры Азат Бадранов республика Башлыгы Радий Хәбировның конференциядә катнашучыларга тәбрикләү сүзләрен җиткерде.
“Башкортстан Республикасы татарларының милли-мәдәни автономиясе” төбәк иҗтимагый оешмасы туган телләрне һәм мәдәниятне саклауда һәм үстерүдә, киләчәк буында туган якка мәхәббәт тәрбияләүдә зур роль уйный, оештырган төрле чаралар, фестивальләр, конкурслар республикабыз халыклары арасында дуслыкны ныгытуга ярдәм итә.
Вице-премьер үз исеменнән республика Башлыгы һәм аның командасы тарафыннан үткәрелүче милли сәясәт берничә төп нәрсәгә юнәлтелгән, дип өстәде. Барыннан да элек, бу — республикадагы һәр кешенең үзен шәхес буларак ачу хокукларының какшамаслыгы.
"Бу җәһәттән без шлюзларны ачтык һәм һәр гражданга да, аерым этник төркемнәргә дә үз-үзеңне тәңгәлләштерү хокукын гамәлгә ашырырга мөмкинлек бирәбез,— дип ассызыклады вице-премьер. — Икенче төп максат — безнең сәясәтебез Башкортстанда яшәүче барлык халыклар республиканы туган йорты буларак тойсын, алар үзләрен монда төп халыклар булуын белсен һәм аңласын. Һәм татар халкы, әлбәттә, беренче чиратта. Безнең республика өч төп халыкның - урыс, башкорт, татар халыкларының дуслыгында һәм бердәмлегендә тора”.
Туган телләрне саклау, белем бирү процессын оештыру турында сөйләгәндә Азат Бадранов, балаларның тел мохитен саклау бик мөһим, дип билгеләп үтте.
“Төбәкләрдә беренчеләрдән булып татар, башкорт телләрендәге җырлар, әкиятләр белән балалар уенчыклары булдыру безнең горурлыгыбыз. Һәм алар бөтен төбәк территориясе буенча таратыла", - диде ул.
Азат Бадранов булачак Бөтенрусия халык санын алу кебек кискен мәсьәләне дә читләтеп узмады.
"Без барыбыз да теге яки бу дәрәҗәдә зур сәяси чараларга бәйле, — диде вице-премьер. — Халык санын алу алдыннан башкорт һәм татар халкы арасындагы мөнәсәбәтләр мәсьәләсе традициягә әверелә, аны даими рәвештә сәясиләштерергә тырышалар. Шуңа бәйле рәвештә, республикада татар халкына янаулар булдыруга юнәлтелгән эчке сәяси бурычлар куелмый дип ышандырырга телим. Моннан тыш, республика Башлыгы Радий Фәрит улы Хәбиров тарафыннан халык санын алуның объектив барышын контрольдә тоту бурычы куелган”.
Вице-премьер конференциядә катнашучыларны, барыннан да элек, “Башкортстан Республикасы татарларының милли-мәдәни автономиясе” активистларын, төбәктә республика халыкларының этномәдәни хокукларын тормышка ашыру өчен формалаша торган процессларда һәм инструментларда актив катнашырга чакырды. Бу - Башкортстан Башлыгы грантлары да, субсидияләр дә.
“Бу башлангычлар концертлар уздыру гына түгел, бер тапкыр үткәрелә торган акция булмасын, ә озак вакыт дәвамында нәтиҗәле булып калачак этномәдәни инфраструктура булдыру булсын иде", — диде Азат Бадранов.
Динар Кәлимуллин фотосы.
