-21 °С
Болытлы
Гәзиткә язылуVKOKTikTokINSTAGRAM
Барлык яңалыклар
Милләт
15 ноябрь 2021, 13:59

Милләтем бизәге — калфагым

Дүртөйле районының Әсән авылында татар хатын-кызларының милли баш киемен тегүче кул осталары бәйге тотты.Калфак — татар хатын кызларының рухи матурлыгын, күңел байлыгын, тегү-чигү эшенә осталыгын чагылдыручы милли баш киеме. Хәзерге вакытта калфак баш киеме буларак яңадан кулланылышка керә башлады. Шуңа да Дүртөйле районы Әсән мәдәният йорты коллективының район күләмендә үткәргән “Милләтем бизәге — калфагым” бәйгесендә тирә-як авыллардан бихисап халык катнашты.

Милләтем бизәге — калфагым

Авыл бу көнне бәйрәм төсе алды. Чараның саф һавада мәдәният йорты алдында үтүе дә бүгенге көн таләп­ләренә туры килде. Бәйрәмгә килү­челәрне “Алтын энә” түгәрәгенә йөрүче хатын-кызлар кулы белән эшләнгән, чараның символы — зур татар калфагы каршылады һәм бәйрәмгә ямь өстәп торды.
Бәйгедә катнашучы туташлар һәм ханымнар, үзләре теккән калфакларын күрсәтә-күрсәтә, бу баш киеме турында кызыклы мәгълүматларны тамашачыларга бәян итте, жыр-моң, бию осталыклары буенча да көч сынашты. Бәйге нәфис сүз, уен-көлке һәм башка төр сәхнә жанрлары белән аралашып барды, конкурсантларга көярмәннәре дә яр­дәмләште.
Бәйге хөкемдарлары булып чыгыш ясаган Дүртөйле район Советы сәркә­тибе Венера Фәйзиевага, Әсән авылы хакимияте башлыгы Рөстәм Кәли­муллинга, Мәдәни ял үзәгенең методик бүлек мөдире Гөлназ Мусинага жиңү­челәрне билгеләү бик читен булды, чөнки конкурста катнашучы­ларның һәркайсы бәйгегә бик жаваплы карап, җентекле әзер­ләнгән иде. Ә әсәнлеләр жиңүчеләргә үз куллары белән бәйләгән бүләкләрен тапшырды. Шулай ук алар искиткеч матур калфаклар теккән, аларның һәркайсы күз явын алырлык үзен­чәлекле, зәвык белән бизәлгән.
Ниһаять, җиңүчеләр билгеләнде. Беренче урынны Исмаелдан Ирина Мөхәммәтшина белән Күккуяннан Эльвира Нәбиева бүлештеләр, икенчегә Иванайдан Гүзәлия Рәхимҗанова белән Әсәннән Миләүшә Шәехова лаек булдылар, өченче урын Суккулдан Гөлшат Нәбиева белән Семилеткадан Гөлчәчәк Янгировага бирелде. “Милли йолаларны саклауга зур өлеш кертүче” номина­циясендә Көшел авылыннан Гөлназ Шәрифуллина һәм Әкәнәй авылыннан Илмира Галләмова җиңеп чыктылар.
Дүртөйле “Бәллүр”, “Хәзинә” татар фольклор коллективы, тальянчылар, “Илһам” гармунчылар ансамбльләре, Әсән мәдәният йортының “Сердәшләр” фольклор һәм “Ак калфак” бию коллективлары чыгышы бәйрәмгә ямь өстенә ямь өстәде. Рөстәм Гәрәев, Эльза Әхмәдиева, Ленар Яримов башкаруындагы жырлар да тамашачының күңеленә хуш килде. Радик Салихов, татар кураенда уйнап, чарага милли аһәң бирде.
Милли киемнәребез тормышыбыздан югалмасын, аларны һәм күркәм гореф-гадәтләребезне киләчәк буынга житкерү — безнең изге бурычлары­бызның берсе. Без, татар хатын-кызлары, милли калфакларда аеруча матурбыз бит! Нәфислек, нәзакәтлелек, горурлык татар хатын-кызын ташламасын иде.

Илфира Газина.
Дүртөйле районы.

Фото: И.Газина.

Автор:Миләүшә Латыйпова