-3 °С
Болытлы
Гәзиткә язылуVKOKTelegram
Барлык яңалыклар
Милләт
6 февраль 2022, 13:00

Күктәге юллар

Рәсемнәргә ике тапкыр Советлар Союзы Герое Муса Гәрәев үзе аңлатма бирә.

Күктәге юллар
Күктәге юллар


Халкыбызда “Кошны – очканда, атны – тау мен­гән­дә, егетне яуда таныйлар” дигән әйтем бар. Ике тапкыр Советлар Союзы Герое Муса Гәрәевның тормыш юлы да нәкъ шушы мәкальгә туры килә. Ул үз гомерен Ватанына багышлап, җанын-тәнен биреп яши. “Гадилектә – гали­­лек” дигәннәре дә нәкъ Муса Гайса улына туры килә. Ул биек үрләр яуласа да, гади һәм гадел булып кала. Гәзитебезнең “Муса Гәрәевка – 100 ел” дигән рубрикасында аның тормыш юлы, якташлары, танышлары, дусларының хатирәләрен биреп баруны дәвам итәбез.

Ике тапкыр Советлар Союзы Герое М. Г. Гә­рәевның Бөек Ватан сугышы фронтларында күрсәткән батырлыклары илебездә киң билгеле. Ул үзенең хәрби юлын Сталинградтан башлый. Данлы якташыбыз хезмәт иткән 1нче гвардия дивизиясенә Идел буендагы хәрби операцияләрдә күр­сәткән хезмәтләре өчен “Сталинград” исеме бирелә. Муса Гайса улы моннан соң үзенең “ИЛ-2” самолетында Донбасста һәм Миус елгасы буенда дошман танкларын, пехотасын һәм аэродромнарын бомбага тота. Сугыш юллары аны Кырымга, Белоруссиягә алып килә, шулай ук ул Вильнюс, Каунас шәһәрләрен азат итүдә, Кенигсберг шәһә­рен һәм Пиллау портын алуда һәм бик күп башка сугышларда катнаша. Барлыгы 250дән артык хәрби очыш ясый.
Безнең фотохәбәрчебез Ә. Зараев күптән түгел Ге­ройның шәхси альбомыннан берничә фотосын тө­шереп алды һәм аннан алар­га аң­латма бирүен үтенде.
— Бу 1944 елның апре­лендә Кырым операциясе алдыннан булды, — диде Муса Гайса улы, бераз уйланып.— Безнең полкка фронт газетасыннан фото­хәбәрче кил­гән иде. Шунда без аэродромда биш очучы җыелып төштек. Сулдан беренчесе татар егете, фамилиясен хәтерләмим. Ул безнең эс­кад­рильядән тү­гел, хәзер дә исән шикелле. Ә аның янында Советлар Союзы Герое Григорий Надточиев. Бик кыю очучы иде. Сапун тавы янында барган һава сугышларында һәлак булды. Нәкъ уртада төшкән егетнең безгә яңа гына килгән чагы. Сугышка кергәч тә дип әйтерлек яшь кенә көе һәлак булды.
Минем янда — Советлар Союзы Герое Ларик Павлов. Икенче рәсемдә дә аның бе­лән утырабыз. Фото­хәбәрче безне хәрби задание белән очар алдыннан һавада хәрә­кәт итү планын тикшереп утыр­ганда төше­реп алган иде.
Өченче рәсемдә безнең “Ил-2”ләр хәрби тәртиптә очып барган вакыт. Фото­хәбәрчеләр, гадәттә, безнең белән стрелок урынына утырып баралар да сугыш кайнап торган урыннардан үзлә­ренә кирәкле рәсем­нәрне төшереп кайталар иде. Монда да безнең самолетлар хәрби задание­ләрнең берсен үтәргә китеп бара,— дип тәмамлады ул сүзен.
Кырымдагы сугышларда Муса Гәрәев хезмәт иткән полк немец фашистларына зур зарар китерә. Таврия ти­рәсендә фронт линия­сеннән 70 километр ераклыкта урнашкан дошман аэ­родромын бомбага тоту өчен полктан өч төркем самолетлар җибә­релә. Алар­ның берсе белән М. Гәрәев җитәкчелек итә. Һөҗүм бик уңышлы була. Аэродромда дошманның 25 самолеты зарарлана, 17се яндырыла. Веселовкага һәм гитлер­чыларның башка аэродромнарына да шундый ук көчле һөҗүмнәр оештырыла.

(“Кызыл таң, 8 май, 1975 ел).

 

Автор:Зөһрә Исламова
Читайте нас: