Ана догасы диңгез төбеннән тартып алыр

Проектның максаты – тормыш символы, илһам чыганагы, гаилә учагын саклаучы, балаларыбызда тормыш кыйммәтләре тәрбияләүче, шул ук вакытта иҗтимагый тормышта актив катнашучы булдыклы, актив хатын-кызларны данлау.

“Башкортстан Республикасының башкорт хатын-кызлары җәмгыяте” төбәк иҗтимагый оешмасы рәисе, Башкортстан Дәүләт җыелышы-Корылтай депутаты, филология фәннәре докторы Гөлнур Колсарина җитәкчелегендәге проект республика күләмендә елдан-ел зур әһәмияткә ия була бара. “Русия халыклары ассамблеясе” оешмасы белән хезмәттәшлек итү турында килешүгә кул куелу нәтиҗәсендә быел конкурска илнең 24 төбәгеннән кушылдылар, 500дән артык гариза килгән.

Быел конкурс финалының төп лейтмотивы – ватанпәрвәрлек, Туган илебезгә карата мәхәббәт. Шуңа күрә чарага Русия Геройларының, махсус хәрби операциядә һәлак булганнарның, бүгенге көндә анда катнашучыларның әниләре чакырылды. Тантанада һәлак булганнан соң "Русия Герое" исеменә лаек булган батыр сугышчылар - Игорь Насыйбуллинның, Максим Серафимовның, Тамерлан Илһамовның әниләре катнашты. Батырлыгы белән күпләрне сокландырган, хәрби хәрәкәтләр вакытында һәлак булган Тәтешле егете Фәнис Хөсәеновның әнисе Фәридә ханым да бу матур чарага чакырылган иде.

Бүгенге тормышыбызны, чынбарлыкны күз уңында тотып, СВОда катнашучыларның әниләре һәм пандемия вакытында барлык тырышлыкларын салып эшләгән, Донбасс халкына ярдәм күрсәткән, махсус хәрби операция вакытында хәрбиләребезгә госпитальләрдә булышкан медицина хезмәткәрләре өчен ике яңа номинация булдырылды.

10 номинациядә җиңгән лидер хатын-кызларыбызга проект партнерларыннан кубоклар һәм бүләкләр тапшырылды. Ә иң лаеклыларга югары бүләк – Башкортстан Республикасы башкорт хатын-кызлары хәрәкәтенең танылган активисты Рабига Кушаева исемендәге “Хатын-кыз – милләт анасы” медале тапшырылды. Бүгенге көнгә республикада һәм Русия төбәкләрендә, БДБ илләрендә 200дән артык хатын-кыз әлеге медаль белән бүләкләнде.

— "Хатын-кыз - милләт анасы». Бу сүзләрдә күп гасырлык зирәклек чагыла. Бүген, безнең ил өчен җаваплы вакытта, хатын-кыз, ана роле аеруча мөһим. Халыкта: «Улын тәрбияләгән — терәк, кызын тәрбияләгән — милләт тәрбияли», диләр. Һәр кеше өчен милләтнең әнисе - ана. "Диңгез төбеннән дә ана догасы алып чыгачак " — бу хакыйкать һәрвакыт актуаль, миллионлаган ана догаларының гаҗәеп көче сансыз мисаллар белән расланган. Без җәмгыять һәм Ватан өчен булдыра алган барлык яхшы һәм игелекле эшләр өчен әниләребезгә рәхмәт әйтәбез! Милләт аналарының догалары Ватанны саклаучылар һәм Ватаныбыз өчен ныклы калкан булсын! Без - бер зур ил. Без, һичшиксез, җиңәчәкбез! — диде үзенең сәламләвендә бәйгенең баш оештыручысы, Башкорт хатын-кызлары җәмгыяте рәисе Гөлнур Колсарина һәм залда утыручы әнисенә чәчәк бәйләмен тапшырды.