Аулак өйләр бездә күңелле үтә!

Сәнгать бүлекчәле Бәләбәй татар гимназиясе коллективы балаларда милли үзаң тәрбияләүгә җитди игътибар бирә. Ничек дисезме? Ата-бабаларыбызның гореф-гадәтләре, күркәм йолалары ярдәмендә башлангыч сыйныфлардан ук кызлар һәм малайларны бер-бер­сенә карата ихтирамлы булырга, бер-берең белән матур итеп сөйләшә, җырлый, бии, кирәк чакта кыю һәм ояла, милли ризыклар пешерә белергә өйрәтә ул. Әйткәндәй,бу җәһәттән гимназия коллективы белән урындагы “Ак калфак” татар хатын-кызлары оешмасының бер-берсенә зур ярдәмче булуы, иҗади дуслыкка таянып эш алып баруы күңелле дә, җимешле дә.

Боларның барысына да уку оешмасында күптән яшәп килгән традиция – сәхнәдә “Аулак өй­ләр” күрсәтү, ә аңа кадәр зур әзер­лек эше алып бару аша ире­шелә. Ноябрьдән үк уздырыла килгән бу матур чараны бу юлы Ольга Исламгулованың, ә аннары Финзирә Шакиро­ваның 2 “б” һәм 5 “б” сыйныфлары укучылары күрсәтте.
Тамаша залында утырган әти-әниләрне һәм башкаларны таң калдырды балаларның осталыгы: биеде дә алар, капма-каршы басып та, бергә кушылып та җырладылар, уеннар уйнаганда төрле һөнәрләрен дә күрсәттеләр. Ә сәхнәдәге аулак өйнең күркәм җиһазланышын, милли киемле кызлар-егетләр­нең матурлыгын әйтеп торасы да юк!
Ике сыйныфның да “Аулак өй” программасы бик бай булды. Капма-каршы сүз әйтеш тә, халык мәкальләрен искә төшерү дә, борынгы “Йөзек салыш”, “Түбәтәй” уеннары – барысы да күңелгә хуш килде.
Әйтергә кирәк, бу чарадан бер генә бала да читтә калмый, “Аулак өй”нең бер максаты – һәр баланы кыю булырга да, кеше арасында үз-үзеңне тота белергә дә өйрәтү.
Шатландырган тагын бер нәрсә: гимназия укытучылары Гүзәл һәм Тимерхан Әхмәтов­лар балаларга борынгыдан килгән күңелле-дәртле һәм моңлы татар халык җырларын өйрәтсә, бию осталыгына тө­шен­дерүче укытучылар Әлфия Меркулова белән Энҗе Баһа­вет­динова татар халык биюлә­ренә өстенлек бирә. Гомумән, балаларны әзерләгән һәркемгә, укучыларның үзләренә, ата-аналарга рәхмәтле булып калды тамаша кылган һәркем.
Сөенечле бер хәл әлеге чараны тагын да баетты. Бәләбәй “Ак калфак” хатын-кызлар оешмасы җитәкчесе Галия Әхмәт­шина, шушындый күңелле “Ау­лак өйләр” күрсәткәндә дә кирәге чыгар дип, картәнисеннән әни­сенә калган, ә әнисе аңа бүләк иткән борынгы кул эшләрен – кадерле ядкарьләрне гимназия музеена тапшырды. Чигүле, киндер сөлгеләр һәм ашъяулык, чаршау, сугылган палас, күп­тәнге булсалар да, күзнең явын алып торалар.
– Сез безне бик шатландырдыгыз, Галия ханым. Безнең этнографик-туган якны өйрәнү музеена алар бик-бик кирәк. Әлеге музей – ата-бабаларыбызның, халкыбызның борынгы тормышын чагылдыручы кадерле ми­рас­ханә, – дип ихлас рәхмәтен белдерде музей җитәкчесе Регина Гомәрова.
Ул залда утыручы башка­ларның да шундый әйберләрне музейга тапшыруын үтенде.
Менә шулай, бездә аулак өйләр бик күңелле, истә калырлык үтә. Халкыбызның тради­цияләрен, йолаларын балалар күңеленә салып саклаганың өчен рәхмәт сиңа, гимназия!

Зәйфә Салихова.