-14 °С
Болытлы
Гәзиткә язылуVKOKTelegramЯRus
Барлык яңалыклар

Республика Башлыгы Благовещенда эш сәфәре белән булды

Бүген Башкортстан Башлыгы Радий Хәбиров Благовещен районында мәгариф һәм сәнәгать учреждениеләрендә булды, ихаталарны һәм җәмәгать территорияләрен төзекләндерү барышын тикшерде.  

Республика Башлыгы Благовещенда эш сәфәре белән булды
Республика Башлыгы Благовещенда эш сәфәре белән булды

Благовещенда Радий Хәбиров «Демография» гомумдәүләт проекты кысаларында төзелгән һәм 220 урынга исәпләнгән «Лукоморье» балалар бакчасында булды. Анда 12 төркем җыелачак, шуларның дүртесе – кече яшьтәге балалар өчен. Биредә 70 кеше эшли.

– Безнең балалар бакчасында беренче катта җылы идән эшләнгән, - дип сөйләде мәктәпкәчә учреждение мөдире Евгения Березина. - Төркем һәм йокы бүлмәләре иркен, заманча азык-төлек блогы, медпункт, музыка һәм спорт заллары бар.

Балалар бакчасы территориясендә саф һавада йөрүне оештыру өчен заманча уен һәм спорт җиһазлары булган мәйданчыклар төзекләндерелгән. Тәрбияләнүчеләрнең хәвефсезлегенә зур игътибар бирелә: бинада автоматик янгын сигнализациясе системасы урнаштырылган, бөтен территория буенча видеокүзәтү алып барыла, үткәрү режимы гамәлдә. Моннан тыш, биналар мөмкинлекләре чикле балалар өчен уңайлы мохит булдыруны исәпкә алып җиһазландырылган.

- Шәһәр өчен бу объект кирәк иде. Балалар бакчасы ачылу белән без мәктәпкәчә учреждениеләрдә урыннар җитмәү мәсьәләсен хәл итәбез, - ди Благовещен районы хакимияте башлыгы Олег Головов.

– Без балалар бакчалары төзибез һәм аларны шунда ук кирәкле җиһазлар белән тәэмин итәбез. Вакытлар узу белән проектларга бассейннарны да кертәчәкбез, – диде Радий Хәбиров.

Башкортстанда 2018 елдан бирле барлыгы 47 балалар бакчасы төзелде. 2021 елда 500 урынга исәпләнгән тагын өч мәктәпкәчә учреждениене файдалануга тапшырырга планлаштыралар.

Благовещенда Башкортстан Башлыгы шулай ук «Башкортстан ихаталары» программасын гамәлгә ашыруның барышы белән танышты. Төбәк җитәкчесе 2019 елда үзе булган Демьян Бедный урамындагы ишегалларының берсенә керде. Ул вакытта халык юлларны һәм тротуарларны ремонтлауның сыйфатына, яшелләндерүнең, парковканың һәм балалар өчен мәйданчыкларның булмавына зарланган иде.

Радий Хәбиров йөкләмәсе буенча быел әлеге ишегалдын республика программасы кысаларында төзекләндергәннәр. Бу максатларга 5,8 миллион сум акча тотынылган. Биредә юллар һәм тротуарлар асфальтланган, бордюрларны алыштырганнар, парковка урыннары оештырганнар, агачлар һәм куаклар утыртканнар. Моннан тыш, ишегалдында хәвефсез резина өслекле спорт мәйданчыгы җиһазландырылган, кече архитектура формалары, яктырту һәм видеокүзәтү системасы урнаштырылган.

Демьян Бедный урамы, 95 йорт адресы буенча урнашкан күпфатирлы йортта яшәүчеләр республика җитәкчесе белән аралашу вакытында бинаның түбәсенә ремонт кирәклеге турында сөйләде. Радий Хәбиров район хакимиятенә йортны 2022 елга капиталь ремонт планына кертү өчен документлар әзерләргә кушты.

Башкортстан Башлыгы шәһәрдә җылыту сезонын кайчан башларга планлаштырулары белән кызыксынды. Благовещен хакимияте башлыгы Сергей Завгородний сүзләренә караганда, социаль объектларга җылы бирәләр инде. Торак йортларга җылылык дүшәмбедән, 20 сентябрьдән, биш көн дәвамында уртача тәүлеклек температура 8 градустан түбәнрәк булган очракта биреләчәк.

Эш сәфәре ахырында Радий Хәбиров Благовещен халкын шәһәргә нигез салынуның 265 еллыгы белән котлады.

Фото: glavarb.ru

Автор:Ләйсән Якупова
Читайте нас в