“Үсеш ноктасы” — зур табыш!

Узган елда Ишембай районының Югары Эткол авылы мәктәбендә Президент Владимир Путинның май указлары белән имзаланган “Мәгариф” гомумдәүләт проекты кысаларында "Үсеш ноктасы" белем бирү үзәге ачылды. Проект өчен ике кабинет бүлеп бирелде, анда санлы һәм гуманитар компетенцияләр, коворкинг зонасы, шахмат кунакханәсе, медиазона урнашкан.

“Үсеш ноктасы" — укытучылар, ата-аналар һәм балалар өчен зур табыш. Яңа технологияләр һәм мөмкинлекләр ярдәмендә дәресләр яңа дәрәҗәгә күчте. Әйтик, тормыш хәвефсезлеге нигезләре укытучысы А. А. Арсланбаев укучылар белән, күргәзмә-методик кулланмалардан файдаланып, беренче медицина ярдәме күрсәтү алымнарын үзләштерделәр. Үзәктәге заманча манекеннар, имитаторлар һәм тренажерлар “табибка кадәр ярдәм” программасы буенча гамәли дәресләрне тормышка ашырырга мөмкинлек бирде. Укучылар төрле хәлләрдә беренче медицина ярдәме күрсәтү буенча белем алды, осталыкларын арттырды.

Мәктәптә шахмат белән мавыгучы балалар да күп. Шахмат уены нигезләрен “Үсеш ноктасы” үзәге педагогы Зилә Исәнгулова алып бара. Хәзер мәктәп укучылары шәһәргә бармыйча да заманча җиһазлар, ноутбуклар кулланып, шахмат белән шөгыльләнә ала. Укытучы фикеренчә, шахмат баланың шәхси үсешенә уңай йогынты ясый. Ел дәвамында “Үсеш ноктасы” үзәге базасында мәктәп укучылары арасында турнирлар даими оештырыла.

Технология дәресләре дә яңа дәрәҗәгә күтәрелде. Балаларга “Лего” конструкторлары белән эшләү бик ошый. Технология укытучысы З. А. Баһаветдинова билгеләвенчә, “Лего” балаларның логик фикерләвен үстерә, чөнки ул 50дән артык модель җыярга мөмкинлек бирә. Конструкцияләү белән беррәттән, балалар электрон штангенциркуль, электролобзик һәм шуруповерт белән эшләү үзенчәлекләрен үзләштерә.

Мондый заманча җиһазларның булуы укучыларның фәннәр белән кызыксынуын арттыра. Уку көннән-көн кызыклырак була бара.

Фото:srk.nationalpriority.ru