Иң зур күлебез чиста булсын!

Шушы көннәрдә Дәүләкән районында "Аслы-Күл" паркы хезмәткәрләре күл акваториясен җыештыру буенча "Чиста боз" акциясе уздырды.

Чара тирә-як мохиткә сакчыл мөнәсәбәтне популярлаштыру, халык арасында экологик культураны арттыру, су объектында һәм яр буе территорияләрендә иң зур күлнең торышы һәм чисталыгын яхшырту максатыннан үткәрелде, ул кышкы чорда балыкчыларның яраткан урыны булып тора.

- Бүген без табигый парк территориясендә өмә үткәрдек, һәм бер көн эчендә ике капчык чүп-чар җыйдык. «Чиста боз» акциясе парклар хезмәткәрләрен генә түгел, ә чикләрендә махсус сакланучы табигать территорияләре урнашкан республика районнарының битараф булмаган кешеләрен дә берләштерә. Бу акцияне Кандракүлдә һәм башка табигый паркларда үткәрергә планлаштырабыз, - дип сөйләде Дирекция җитәкчесе Салават Нәфыйков.

Исегезгә төшерәбез, Башкортстан инде берничә ел Русия Президенты Владимир Путин билгеләгән "Экология" гомумдәүләт проектының "Уникаль су объектларын саклау" федераль проекты кысаларында гамәлгә ашырыла торган "Русия суы" су объектларының ярларын чистарту буенча бөтенрусия акциясендә актив катнаша. Акция чаралары ел саен бөтен республика территориясендә уздырыла.

Фото: ecology.bashkortostan.ru