+21 °С
Болытлы
Нацпроекты - гомумдәүләт проектлары
6 март 2022, 08:46
"Ярдәм булмаса, өебезне кайчан төзеп бетерер идек?"
Аскын районында Нурания һәм Илнар Гыйльмияровлар гаиләсенә авылда торак төзү (сатып алу) өчен социаль түләү алуга таныклык тапшырылды.Әлеге ярдәм “Башкортстанда авыл территорияләрен комплекслы үстерү” программасы кысаларында гамәлгә ашырылды. Программа илебез Президенты Владимир Путин тарафыннан булдырылган "Торак һәм шәһәр мохите" гомумдәүләт проектына карый.
"Ярдәм булмаса, өебезне кайчан төзеп бетерер идек?"
Бу вакыйганы Гыйльмияровлар биш ел көткән. Торак шартларын яхшыртуга чиратта алар 2017 елдан бирле торган. Ел саен документ яңартып торсалар да, әлеге ярдәмне алачакларына бик ышанып бетмәгәннәр.
- Әкренләп төзелешне алып бардык - нигезен салдык, йортны күтәрә башладык. Октябрьдә ирем белән бергә яшәвебезгә 8 ел була. Ул вакытка гаилә бәйрәмебезне яңа өйдә каршыларбыз, дигән өметтәбез, - ди Нурания Гыйльмиярова.
Гаиләдә 2 малай һәм бер кыз тәрбияләнә.
- Булачак яңа йортта үзара аңлашу, ярдәмләшү, бәхет, уңайлылык хакимлек итсен! - дип теләде документны тапшырганда Аскын районы хакимияте башлыгы Динис Йосыпов.
- Мондый ярдәмегез өчен зур рәхмәт, - ди Нурания Гыйльмиярова. - Уртак тормышның беренче көннәреннән үк безгә торак арендалап яшәргә туры килә. Хезмәт хакларыбыз зур түгел. Мин үзем декретта, моңа кадәр яшьләр сәясәте бүлегендә педагог-психолог булып эшләдем, ирем юл оешмасында машина йөртүче булып хезмәт итә. Балаларга да акча күп китә. Әгәр дә бу ярдәм булмаса, кайчан өебезне төзеп бетерер идек әле, - ди ул.
