Авыл хуҗалыгына заманча технологияләр килә

Республика дәүләт идарәсен санлы үстерү министры Геннадий Разумикин хәбәр иткәнчә, «Русия Федерациясенең санлы икътисады» гомумдәүләт проектының бурычларыннан берсе – икътисадның реаль секторы ягыннан IT-продуктларга ихтыяҗны стимуллаштыру, шулай ук санлы продуктларны эшләүчеләргә ярдәм итү.

- ВЭБ.РФ комплекслы ярдәме аркасында Башкортстан төрле өлкәләрдә санлы продуктлар эшләүне һәм кертүне финанслауда катнаша, - дип билгеләп үтте министр. - 2022 елда грант ярдәме шартлары тагын да кызыклырак булды. Аерым алганда, предприятие тарафыннан проектларны финанслау проценты 50 проценттан 20 процентка кадәр кимеде. Шулай итеп, чыгымнарның 80 процентын дәүләт үз өстенә ала.

2022 елда Башкортстан агросәнәгать комплексы өлкәсендә 400 миллион сумнан артык дүрт уникаль санлы проект уңышлы якланды. Аның 327 миллион сумы мәгълүмати технологияләр өлкәсендә Русия карарларын гамәлгә кертү кысаларында «Сколково» Фонды тарафыннан бирелгән.

Якындагы ике елда Дуван районыннан «Рассвет», Зианчура районыннан «А7 Агро – БР», Гафури районыннан «Восход СТ» һәм Стәрлетамак районыннан Калинин исемендәге авыл хуҗалыгы предприятиеләрендә санлы трансформация инструментлары кертелә.

Калинин исемендәге агропредприятиедә санлаштыру сөт һәм ит җитештерүнең тулы циклын контрольдә тотарга мөмкинлек бирәчәк. Нәтиҗәдә сөт җитештерү 7 процентка, ит җитештерү 15 процентка кадәр артачак. Бу продукцияне сатудан өстәмә 123 млн. сум күләмендә табыш китерәчәк.

«Рассвет» җәмгыяте яңа технологияләр ярдәмендә игенчелек, терлекчелек, җитештерү һәм эшкәртү юнәлешләре мәгълүматларын Бердәм интерфейста берләштерәчәк. Бу сөрүлекләрне һәм эшкәртү цехларын 20 процентка кадәр күтәрергә һәм биш ел эчендә өстәмә рәвештә 100 миллион сумнан артык акча алырга мөмкинлек бирәчәк.

Зианчура районында санлы кошчылык фабрикасы проекты биш ел дәвамында йомырка җитештерүне арттыру хисабына 114,5 миллион сумлык икътисади нәтиҗә китерәчәк.

Башкортстан Башлыгы төбәкнең Санлы үсеш министрлыгы хезмәткәрләренә башкарган эшләре өчен рәхмәт белдерде.