Кышын да җиләк үстерү турында хыяллана

Башкортстанда 25 яшьлек Бишбүләк фермеры грант ярдәмендә бакча җиләге үстерә.

Былтыр Бишбүләк районыннан Булат Ногманов “Агростартап” грантына икенче тапкыр конкурста җиңү яулады. Нәтиҗәдә, ул үз бизнесын үстерүгә 2,8 миллион сум дәүләт ярдәмен алды.

Республиканың Авыл хуҗалыгы министрлыгында Булат Ногмановның һөнәре буенча химик-технолог булуы, әмма туган җирендә сәламәт, табигый һәм сыйфатлы продуктлар җитештерү теләге аны җиләкләр үстерергә этәрде, дип сөйләделәр.

Әлбәттә, башлап кына килүче фермерны аның эшендә район хакимияте дә хуплаган, җир бүлеп биргән. Бүген авыл эшкуарының мәйданы 3 гектар тәшкил итә, анда аның гаиләсе һәм авылдашлары эшли.

Грант акчасына егет хезмәтне механикалаштыру өчен җиһазлар һәм техника сатып алган һәм хәзер бизнесны алга таба киңәйтү турында уйлый. Эшкуар сүзләренчә, җиләк үстерү - ул сезонлы бизнес. Ул, бакчаны карау иртә яздан башлана һәм көз көне тәмамлана, дип сөйләде. Һәм бу чорда фермерда 25 кеше ялланып эшли.

«Кышын да яңа җиләккә ихтыяҗ бар, шуңа күрә без аны теплицада үстерү ысулларын һәм технологияләрен өйрәнәбез, - дип уртаклашты Булат Ногманов. - Аны ел әйләнәсенә үстерү мәсьәләсен җайга салырга хыялланабыз. Уңышның 70 процентын Уфага җибәрәбез, калганын Бишбүләктә һәм күрше районнарда сатабыз ".

Республика Авыл хуҗалыгы министрлыгында «Агростартап» программасының «Кече һәм урта эшкуарлык һәм шәхси эшкуарлык башлангычларына ярдәм» гомумдәүләт проекты кысаларында гамәлгә ашырылуын билгеләп үттеләр. Булат Ногманов белән бергә Башкортстанда тагын 38 эшкуар былтыр грантлар алган. Дәүләт ярдәменең гомум суммасы 125,4 миллион сум тәшкил иткән.

Фото: agriculture.bashkortostan.ru

#национальныепроекты