Бәләбәй сыры Европага озатылды

Русиянең иң эре җитештерүчеләренең берсе - Бәләбәй сөт комбинаты экспортлана торган продукция ассортиментын ( ярым каты, каты сырлар һәм акмай) киңәйтә, дип хәбәр итә төбәкнең Авыл хуҗалыгы министрлыгы матбугат хезмәте.

Предприятие августта беренче тапкыр Европага каты сыр озатты. Продукциянең гомум авырлыгы 19 тоннага якын булган беренче партиясе Сербия Республикасына китте. Исегезгә төшерәбез, бер ай элек шундый ук күләмдә җитештерүче беренче тапкыр атланмай партиясен җибәрде.

Экспортер продукциясе ветеринария сертификатын алу өчен лаборатор тикшеренүләр узды, дип хәбәр иттеләр "Россельхознадзор"ның Башкортстан буенча идарәсендә. Нәтиҗәләр буенча, "Гауда" каты сыры партиясе 45 процент майлылык белән импортер-илнең тиешле таләпләренә туры килә, дип танылды.

Әйтергә кирәк, үткән елда Башкортстаннан экспортка якынча 46 тонна сыр җибәргәннәр. Агымдагы елда да шундый ук күләмдә продукция августка озатылган да инде. Сүз уңаеннан, агросәнәгать комплексы продукциясен экспортлау структурасында май продукциясе һәм азык-төлек һәм эшкәртү сәнәгате продукциясе өстенлек итә.

Исегезгә төшерәбез, 2014 елдан "Халыкара кооперация һәм экспорт" гомумдәүләт проекты гамәлгә ашырыла. Аның максаты - 2030 елга чимал булмаган товарлар экспортын 2020 елдагы белән чагыштырганда 70 процентка арттыруны тәэмин итү.

Фото: bash.news