Башкортстан урманнарын көн саен һавадан тикшерәләр

Башкортстанда урманнарның янгын куркынычы чорындагы торышын күзәтү дәвам итә. Эшләр «Экологик иминлек» гомумдәүләт проекты кысаларында алып барыла.

Төбәкнең урман мәйданы зур һәм рельефы катлаулы булу сәбәпле, авиапатруль урман янгыннарын иртә ачыклауның мөһим ысулларының берсе булып тора. Һавадан күзәтү төтенне ерак һәм авыр барып җитә торган урыннарда да ачыкларга мөмкинлек бирә.

Янгын куркынычы сезоны башыннан белгечләр 227 очыш башкарган, очкычларның гомум очыш вакыты 707 сәгатьтән арткан. Узган елның шул ук чорында 126 очыш булган.

Быел авиакүзәтү экипажлары Бөрҗән һәм Учалы урманчылыклары территорияләрендә ике урман янгын чыганагын вакытында ачыклаган. Бу янгынга каршы көчләрне тиз арада җәлеп итеп, утның таралуына юл куймаска мөмкинлек биргән.

Башкортстан Урман хуҗалыгы министры Марат Шәрафетдинов сүзләренчә, быел очышлар саны узган ел белән чагыштырганда ике тапкыр диярлек арткан. Мондый күзәтү янгын сүндерүчеләрне төгәл урынга юнәлтергә һәм көчләрне нәтиҗәлерәк кулланырга ярдәм итә.

Урманнардагы хәлне контрольдә тоту көн саен алып барыла. Моның өчен авиация, пилотсыз очкычлар, видеокүзәтү системасы һәм җирдәге мобиль патрульләр кулланыла.

"Кызыл таң"ның да МАХ мессенджерында рәсми каналы бар. Кушылыгыз!
Каналга кушылыр өчен шушы сылтама буенча үтегез: max.ru/kiziltan102