Башкортстанда ятимнәр саны кими

Түбән Новгородта узган “Гаилә - беренче урында” форумында республика вәкилләре дә катнашты.

Башкортстанда соңгы 6 елда ятимнәр өчен учреждениеләргә эләккән балалар саны 2 тапкыр кимегән, ә балалар приютлары саны 38дән 31гә калган.

Русия Президентының Идел буе федераль округындагы Тулы вәкаләтле вәкиле Игорь Комаров хәбәр иткәнчә, соңгы өч елда округта 3 яшьтән 17 яшькә кадәрге балигъ булмаганнар өчен социаль-тернәкләндерү үзәкләренә урнаштырылган балалар саны ата-ана гаризасы буенча 10 процентка кимегән, ә опекага туганнарының гаиләләренә тапшырылган балалар саны 14 процентка арткан.

- Округ буенча туган гаиләләренә һәм туганнарына кайтарылган балаларның уртача өлеше түбән булып кала – 43 процент. Учреждениеләргә кабат эләгүчеләр саны кимеми, мондый күрсәткеч, әлбәттә, шатлыклы түгел. Димәк, профилактик чаралар тагын да нәтиҗәлерәк булырга тиеш. Моның өчен махсуслаштырылган проектларны киңәйтергә, эчүче ата-аналарга, хатын-кызларга ярдәм итәргә, балалар психикасының үзенчәлекләре турында ата-аналар белән күбрәк сөйләшергә, белгечләрне өйрәтергә кирәк, - дип ассызыклады Русия Президентының Идел буе федераль округындагы Тулы вәкаләтле вәкиле Игорь Комаров.

Форумда Башкортстан вәкилләре мондый гаиләләр һәм балалар белән эшләүне оештыруда ведомствоара хезмәттәшлекнең уңышлы тәҗрибәсе белән уртаклашты.

Фото: башинформ.рф