"Талантлар йолдызлыгы" янә кабынды!

Бүген йөзләгән тамашачы «Талантлар йолдызлыгы» проектында катнашучыларны һәм җиңүчеләрне берләштергән онытылмас тамаша шаһиты булды.

"Егет һәм кызлар өчен мондый чыгышлар - беренче чиратта социальләшү. Дүрт стенада яшәүче физик мөмкинлекләре чикле кешеләр өчен мондый концертлар – зур тәҗрибә һәм зур плюс. Без шөгыльләнәбез, без үзгәрәбез һәм тагын да активлашабыз. Дүрт стенада, дәваханәләрдә көн күрүче балалар өчен безнең «Талантлар йолдызлыгы» конкурсы - бу формалашуда зур ярдәм, зур дөньяга чыгу... – дип уртаклашты кунаклар белән "Ана йөрәге" Аналар советы төбәк иҗтимагый оешмасы рәисе Гөлшат Ибраһимова.

Концертны Антон Масунов ачып җибәрде, ул ишарәләр белән җырлау жанрында «Бәхет кошы» номерын башкарды, һәркемгә сүзсез дә аңлаешлы сәнгать көчен күрсәтте һәм кичнең югары эмоциональ планкасын бирде.
Бу жанрда тамашачыларга Милена һәм Глеб Рыбалкиннар дуэты истә калды, алар күңелгә үтеп керерлек «Нәни принц» музыкаль-ишарәләр җырын тәкъдим итте.

Татарча попуррины Айдар Рәҗәпов республикада танылган гармунчылар – бертуган Юнысовлар аккомпанементы астында башкарды, алар гомум номерда үзләренең чагу музыкаль чыгышы белән финал аккордын куйды. Азат Закировның «Күҙ нурым» һәм «Моя Уфа» җырлары белән чыгышында, шулай ук Элина Хөснетдинова башкаруында «Россия я и ты» композициясендә лирик һәм патриотик ноталар яңгырады.