Студотрядларның хезмәт семестры ябылды

Уфаның «Торатау» Конгресс-холлында Башкортстан Башлыгы Радий Хәбиров төбәкнең студентлар отрядларының өченче хезмәт семестрын тәмамлау тантанасында катнашты. Чара 500 командир һәм студентлар отряды әгъзаларын җыйган слет форматында узды.

Республика җитәкчесе билгеләп үткәнчә, студентлар төзелеш отряды хәрәкәтен үстерү белән җитди шөгыльләнәчәкбез. Аның сүзләренә караганда, быелгы бу эш проектка 10 меңгә якын студент һәм укучыны җәлеп итәргә мөмкинлек биргән. Ул бу эшчәнлекне алга таба да киңәйтергә кушты.

Радий Хәбиров ассызыклаганча, мондый отрядларда студентлар "практик эштә яхшы күнекмәләр ала", һәм бу максатларга республика федераль акча җәлеп итә. Ул билгеләп үткәнчә, мондый хезмәт күп кенә предприятиеләр өчен, республика һәм тулаем ил өчен мөһим һәм яшьләргә «яхшы гына акча эшләргә» мөмкинлек бирә, коммуникацияләрне үстерү өчен менә дигән ысул булып тора.

Башкортстан студентлар отрядлары җитәкчесе Элина Саматова яшьләрнең нәтиҗәле эшен оештыру өчен төбәктә Координацион совет һәм Оператив штаб төзелүен билгеләп үтте. Ул республикада 52 хезмәт проекты гамәлгә ашырылуы, нәтиҗәдә, 4 270 яңа эш урыны барлыкка килүе турында сөйләде. Аның сүзләренчә, студентлар өчен бу - төбәктә эшләү, урындагы предприятиеләр һәм бизнес үсешенә ярдәм итү мөмкинлеге. Элина Саматова Башкортстаннан 850 студентның Краснодар краенда, Кырымда, Татарстанда, Алтайда һәм Камчаткада эшләвен әйтте. Беренчел исәпләүләр буенча, студент отрядлары егет-кызлары башка төбәкләрдә дә эшләгән һәм өйләренә 520 миллион сумга якын акча алып кайткан.

2026 елда активистлар санын арттыру һәм аларны эшче һөнәрләренә өйрәтү планлаштырыла. Мәсәлән, авыл хуҗалыгы, төзелеш һәм сервис юнәлешләрендә яңа отрядлар төзелә башлаган да инде. Мондый эшне 140 отряд алып бара, шуларның 123е – югары уку йортларында, 17се – урта һөнәри белем бирү учреждениеләре базасында.

Фото: ufa.mk.ru