Белоруссия делегациясе бездә фәнни стажировка узды

Фәнни-мәгариф өлкәсендә ике яклы хезмәттәшлекне үстерү кысаларында Беларусь Республикасы делегациясе Уфада фәнни стажировка үтте. Визит бөтендөнья дәрәҗәсендәге Евразия фәнни-мәгариф үзәге (НОЦ) тарафыннан оештырылды һәм Башкортстан һәм Беларусь республикаларының югары уку йортлары һәм фәнни оешмалары арасында партнерлык элемтәләрен ныгытуда мөһим адым булды.

Стажировка вакытында кунаклар практик өлешкә аерым игътибар бирде: катнашучылар М. Акмулла исемендәге БДПУ базасында «Интеграль фотоника нигезендә җайланмаларны тикшерү, эшләү һәм модельләштерү» темасына квалификация күтәрү курсын үтте. Делегация, шулай ук, төбәкнең фәнни-технологик экосистемасы турында тулы күзаллау алу өчен Уфаның әйдәп баручы югары уку йортлары, фәнни учреждениеләре һәм предприятиеләре тәҗрибәсен өйрәнде.

Стажировканың төп максаты - Башкортстан университетларының, фәнни оешмаларының һәм предприятиеләренең «Фотоника» юнәлеше буенча проектларны гамәлгә ашыруда уңышлы тәҗрибәсен тапшыру. Визитның төп вакыйгасы вузара кампуста «Идеяләрдән - гамәлгә ашыруга: фотоника һәм электроника өлкәсендә уртак проектлар» дип аталган халыкара стратегик сессия булды. Чара Беларусь һәм Башкортстан югары уку йортлары арасындагы партнерлыкны үстерүгә багышланган иде.

- Безнең илләр технологик үсеш мәсьәләләрендә алымнарның һәм стратегик өстенлекләрнең бердәмлеген күрсәтә. Без хезмәттәшләребезне Башкортстанның фотоника өлкәсендәге алдынгы лабораторияләре һәм компетенцияләре белән таныштырып кына калмадык, уртак магистрлык программаларын һәм тикшеренү проектларын эшләтеп җибәрү турында конкрет килешүләргә дә чыктык. Ышанам, бу озак вакытлы партнерлык өчен ныклы нигез булачак, - дип билгеләп үтте НОЦ идарәче компаниясе директоры вазыйфасын башкаручы Андрей Кулаков.

Фото: pravitelstvorb.ru