+13 °С
Облачно
Яңалыклар
23 Июня , 00:25
Төсләр аша - хисләргә!
Дүртөйле районының Әсән авылы яңа буын китапханәсе Русия Президенты Владимир Путинның май указларына ярашлы кабул ителгән «Гаилә» гомумдәүләт проекты кысаларында башлап җибәрелгән «Космик Әлифба» инновацион проектын гамәлгә ашыру мәйданчыгы булды.
Әлеге мавыктыргыч проектның максаты үсмерләргә үзләренең эчке потенциалын ачарга ярдәм итү иде. Бу максатка ирешү өчен психолог Әлфия Мәхмүтованы чакырдылар. Белгечнең бурычы яшь хыялланучыларны үз теләкләрен формалаштырырга гына түгел, ә аларны көчле арт‑терапия коралы ярдәмендә визуальләштерергә дә өйрәтүдән гыйбарәт иде.
Чара тулысынча иҗат дөньясына чумудан башланды. Катнашучыларга үз хыялларын ясарга гына түгел, ә аларны чиксез космик галәм фонында урнаштырырга кирәк иде. Бу символик гамәл галәмгә үзенә бертөрле юллама булды: һәр хыял йолдызлар арасында үз урынын тапты. Эштә төрле материаллар: акварель, карандашлар, акбур, шулай ук көтелмәгән, ләкин бик нәтиҗәле техникалар кулланылган. Мәсәлән, су сибү чын «йолдызлы яңгырга» әверелде, балалар иҗатына космик тылсым өстәде.
Психолог балаларга төсләрнең эчке кичерешләрне ничек чагылдыра алуы һәм һәр төсмернең үзендә билгеле бер хисләр йөртүе турында сөйләде. Буяулар һәм формалар дөньясына чумып, катнашучылар үзләрен белдерү генә түгел, ә үз хисләрен яхшырак аңлый алдылар.
Фото: Дүртөйле районы хакимияте сайтыннан.
