Белорет районында кышка әзерлекне 15 сентябрьгә тәмамларга планлаштыралар

Башкортстан Хөкүмәте Премьер-министры Андрей Назаров Белорет районына эш сәфәре барышында торак-коммуналь хуҗалык һәм транспорт тармакларының көзге-кышкы чорга әзерлеге буенча киңәшмә үткәрде. Республика бюджетыннан җылылык челтәрләрен төзекләндерү һәм ремонтлау эшләренә 800 миллион сумнан артык акча юнәлдереләчәк. Белорет районының юл челтәре якынча 2 мең километр тәшкил итә. Кышкы чорга әзерлек кысаларында 2,8 мең тоннадан артык бозлавыкка каршы материал әзерләнгән, 39 махсус техника берәмлеге сафка бастырылган.

– Район юлларының яртысыннан артыгы җирле әһәмияттәге юлларга туры килә. Шуңа күрә кышка төп юлларны гына түгел, авыл җирлекләре аша узучы юлларны да әзерләү мөһим, – дип ассызыклады Андрей Назаров.

Районда җылылык челтәрләренең әзерлеге дәвам итә. Аларның гомум озынлыгы 117 километр тәшкил итә. 12 участокның тугызында ремонт тәмамланган, калган эшләрне 15 сентябрьгә кадәр төгәлләргә планлаштыралар.

Белорет районында 2026–27 елларда 12нче һәм 3нче микрорайоннардагы 8 километр эчке квартал җылылык челтәрен яңарту күздә тотыла. Шулай ук Маяковский урамындагы 1,7 километр озынлыктагы төп җылылык челтәрен реконструкцияләү планлаштырыла. Республика Транспорт һәм юл хуҗалыгы министрлыгы мәгълүматларына караганда, 2026 елда районның юл челтәрен ремонтлау һәм карап тотуга төбәк юл фондыннан 1 миллиард сумнан артык акча бүлеп бирелгән.

Белоретта заманча поролон җитештерә башлаячаклар

Эш сәфәре барышында Андрей Назаров «Чиста поролон» компаниясенең пенополиуретан җитештерү проектын да карады. Проектка 190 миллион сум инвестиция кертү планлаштырыла. Предприятие эшли башлагач, 15 яңа эш урыны булдырылачак. Җитештерүне 2026 елның өченче кварталында эшләтеп җибәрү планлаштырыла.

Яңа комплекс югары технологияле поролон җитештерүгә юнәлтеләчәк. Предприятие заманча автоматлаштырылган җиһазлар белән тәэмин ителә. Җитештерүдә Русиядә җитештерелгән чимал һәм экологик яктан куркынычсыз технологияләр куллану күздә тотыла. Пенополиуретан мебель, төзелеш, автомобиль һәм җиңел сәнәгатьтә киң кулланыла. Яңа җитештерү Урал һәм Идел буе базарларындагы ихтыяҗны канәгатьләндерергә һәм чит ил продукциясен алмаштырырга ярдәм итәчәк.

– Заманча сәнәгать җитештерүен үстерү – төбәкнең икътисади сәясәтендәге өстенлекле юнәлешләрнең берсе. Белореттагы проект районның һәм республиканың сәнәгать потенциалын ныгытып кына калмыйча, яңа эш урыннары булдырырга һәм мөһим тармакларда импортны алыштырырга ярдәм итәчәк, – диде Андрей Назаров.

"Кызыл таң"ның да МАХ мессенджерында рәсми каналы бар. Кушылыгыз!
Каналга кушылыр өчен шушы сылтама буенча үтегез: max.ru/kiziltan102

Фото: Макс Евтеев, Башинформ