Башкортстан делегациясе «Русия – спорт державасы» форумында эшли

Башкортстанның рәсми делегациясе Красноярскида эш сәфәрендә. Республика Башлыгы Радий Хәбиров кушуы буенча аны Башкортстан Хөкүмәте Премьер-министры урынбасары — спорт министры Руслан Хәбибов җитәкли. 21–24 октябрьдә биредә XIV «Русия – спорт державасы» халыкара спорт форумы уза.

Бүген делегация Русия Паралимпия комитеты президенты Павел Рожков чакыруы буенча 2026 ел нәтиҗәләре буенча иң яхшы паралимпиячеләрне хөрмәтләү тантанасында катнашты. «Тормышка кайту» дип аталган чара халыкара форумның махсус вакыйгасы булып тора.

Руслан Хәбибов билгеләп үткәнчә, Башкортстанда адаптив спортны үстерүгә зур игътибар бирелә.

— Безнең өчен адаптив спорт темасы бик якын, аны үстерү юнәлешендә даими эшлибез. Бүген республикада адаптив физик культура һәм спорт белән 47 меңгә якын кеше шөгыльләнә, — диде ул. Шулай ук спорт министры Русия Паралимпия комитеты Башкортстанның ярдәменә һәрвакыт өметләнә алуын ассызыклады.

Тантана кысаларында Руслан Хәбибов «Шәхси үрнәге белән» номинациясендә җиңүчене — Русиянең паралимпия йөзү җыелма командасының баш тренеры, терәк-хәрәкәт аппараты зарарланган спортчылар җыелма командасының өлкән тренеры Юрий Назаренкога бүләк тапшырды.

2026 елгы Европа чемпионатында аның җитәкчелегендә Русиянең паралимпия йөзү җыелма командасы 92 медаль яулады. Шуларның 33е — алтын, 39ы — көмеш һәм 20се — бронза. Команда гомумкоманда зачетында беренче урын алды.

«Русия – спорт державасы» халыкара форумының эшлекле программасы 22 октябрьдә башлана. Аның кысаларында Русия Спорт министрлыгы җитәкчелеге белән эшлекле очрашулар һәм пленар утырышта катнашу планлаштырылган.

"Кызыл таң"ның да МАХ мессенджерында рәсми каналы бар. Кушылыгыз!
Каналга кушылыр өчен шушы сылтама буенча үтегез: max.ru/kiziltan102