\"Мәктәптә наркотикларга урын юк!\"

Сер түгел, бары тик ата-аналарның, мәктәп һәм вуз укытучыларының, медикларның, хокук саклау органнары хезмәткәрләренең, гомумән, бөтен җәмгыятьнең тырышлыгы белән генә наркомания һәм токсикомания кебек ямьсез күренешләрне кисәтүдә җитди нәтиҗәләргә ирешергә мөмкин. Менә шуны аңлау РФ Наркотиклар әйләнешенә контрольлек итү буенча федераль хезмәтнең Башкортстан буенча идарәсен, Салават шәһәр округы һәм “Салаватнефтеоргсинтез” җәмгыяте хакимиятен “Мәктәптә наркотикларга урын юк” дигән тиңдәшсез профилактик чара оештыруга этәрде дә инде.
Мәктәп, билгеле булуынча, икенче йорт ул. Биредә дә, баланың туган йортындагы кебек, барлык мөнәсәбәтләр үзара аңлашуга һәм ышанычка корылсын иде. Беренче тапкыр дәүләт структуралары һәм бизнес вәкилләре ата-аналарга балаларын наркоманиядән саклауда ярдәм итәргә, ә иң мөһиме — аларның психоактив матдәләр белән хәвефле мавыгуына юл куймаска карар итте. Салават шәһәренең барлык гомуми белем бирү учреждениеләренең “Йөрәк җылысы белән саклыйк!” лозунгы астында үткән ата-аналар җыелышларында өлкәннәр йорт шартларында балаларның организмында наркотиклар булу-булмавын билгеләүгә тестлар алды. Тест ирекле нигездә үткәреләчәк. Ягъни баласына тест үткәрүне яки үткәрмәүне ата-ана үзе хәл итәчәк.
Бу акциянең генераль партнеры — “Салаватнефтеоргсинтез” ачык акционерлар җәмгыяте бизнесның социаль җаваплылыгы турында ачыктан-ачык белдерде һәм башка эре компанияләр вәкилләрен дә шәһәрендә шундый акция үткәрүне хуплап чыгарга чакырды.
Үз хәбәрчебез.