Батыр рухына корбан чалынды

Пулемет взводы командирының яр­дәм­чесе, өлкән сержант Әмир Сөләй­ман улы 1943 елның 23 сентябрендә салда Днепрны кичеп, фашистларның утлы ноктасын бастыра һәм 18 гитлерчыны юк итә. Шулай итеп, ул башка под­разделениеләрнең елганы кичеп, алга таба хәрәкәтен тәэмин итә. СССР Югары Советы Президиумы указы белән 1944 елның 15 гыйнварында хәрби заданиене яхшы үтәгәне һәм каһарманлык күр­сәткәне өчен гвар­дия өлкән сержанты Әмир Хәйдәровка Ленин ордены һәм “Алтын йолдыз” медале тапшырыла.
1945 елда фашист илбасарларын җи­ңеп кайтып, Әмир Хәйдәров Кодаш авылы кулланучылар кооперациясе рәисе, “Урал” колхозының өлкән лесничие булып эшли. Ул 1996 елның 25 ноябрендә 85 яшен­дә вафат була.
Бүген Кодаш авылының үзәк урамы Советлар Союзы Герое Әмир Хәйдәров исемен йөртә. Әмир Сөләйман улы рухына багышлап корбан чалуны авылыбызның мәчеткә һәрдаим ярдәм итеп торучы игелекле улы, “Баш­геофизи­ка” җәмгыяте башлыгы урынбасары Шамил Шәисламов оештырды. Аның хәйрия яр­дәме белән корбанга сарык чалынды һәм мәчеттә зур мәҗлес оештырылды.
Бу мәҗлестә башлап йөргән Шамил Гатуф улының әнисе Сания ханым болай диде: “Без гаиләбездән киткән барлык әрвахлар рухына да корбан чалдырдык, зур эшләр башкарганда нәзер корбаннары да еш чалабыз. Бу юлы Шамил улым корбанлыгын Бөек Ватан сугышы батыры Әмир ага рухына багышларга булды. Ходай кабул итсен”.
Мәҗлескә Тәтешле мөхтәси­бәте имам-­хатыйбы Фәнис Ну­ретдинов, Әри-баш авылыннан Фоат хәзрәт, Бәдрәштән Әмир­җан хәзрәт, Күрдемнән Мәгъдән хәзрәт һәм башка күп кунаклар килгән иде.
— Кодаш мәхәлләсендә Аллаһ ризалыгы өчен изге эшләр еш башкарыла, ел саен зурлап Корбан ашлары уздырыла, — диде Мәгъдән Атнабаев.
Югары Кодаш мәчетен җылы һәм нур­лы тотуы, шундый мәҗлесләр үткә­рүе өчен Зәви хәзрәт Нуриевка һәм аның гаи­лә­сенә ихлас рәхмәт сүзләрен юллады ул.