-22 °С
Болытлы
Гәзиткә язылуVKOKTikTokINSTAGRAM
Барлык яңалыклар
Җәмгыять
16 декабрь 2014, 21:45

Халыкка хезмәт итик!

“Казан” милли-мәдәни үзәгендә Бөтендөнья татар конгрессы Башкарма комитетының ел йомгакларына багышланган киңәйтелгән утырышы булды. Беренче көнне делегатлар, җиде секциягә бүленеп, үз тармакларындагы иң җитди мәсьәләләр буенча фикер алышты.Без киңкүләм мәгълүмат чаралары комиссиясе утырышында катнаштык. “Яңа гасыр” телера­дио­компаниясенең генеральный директоры, Дәүләт Советы депутаты Илшат Әминев урысча эфирга чыгучы “Семь дней” тапшырулары бе­лән яхшы билгеле. Сөйлә­шүне ул бик матур итеп татарча алып барды, чыгыш ясау­чы­ларның теләк-тәкъ­дим­нәренә колак салырга тырышты.

Иң элек Конгрессның матбугат хезмәте җитәкчесе Гөл­наз Шәйхи әзерләгән видеохисап күрсәтелде, анда Конгресс канаты астында әзер­ләнүче медиа эшчәнлеге күз алдына килеп басты.
“Татмедиа” җәмгыятенең генеральный директоры ки­ңәшчесе Римзил Вәлиев милли басма­ларның укучылары санын югалтмау, татарлар яшә­гән төрле төбәкләрдә язылу бәясен көйләү, электрон мәгъ­лүмат чаралары үсү-үзгәрү нәтиҗәсендә гәзит-журналларны саклап калу мәсьәләләренә кагылды.
“Безнең татар халкы ниндидер авырлык килгәндә генә үзенә көч туплап, алга адым ясый, бүгенге кризиста да без укучыларыбызны югалтмабыз. Бер-беребезгә “үләсез, яши алмыйсыз” дигән диагноз куюдан сак булыйк. Эшләребезне башкарыйк, милләткә хезмәт итик, әмма янәшәдәге үзебез кебек­ләрне чеметеп, тәгәр­мәч­ләренә таяк тыгу дөрес түгел”, — диде “Ватаным Татарстан” гәзитенең баш мөхәррире Миңназыйм Сәфә­ров.
“Кызыл таң” гәзитенең баш мөхәр­рире Фаил Фәтхетдинов­ның чыгышын Президиум да, зал да зур игътибар белән тың­лады, берничә сорау да бирелде. “Гәзиткә ярты елга язылу хакы 1312 сум, шуның 70 процентын почта ала, — диде баш мөхәррир. — Почтаны финанслау өчен яшәгәнче дип, хәлдән чыгу юлын эзлибез. Гәзитебез өчен берничә язылу индексы булдырдык. Кемдер атнасына дүрт килгәнен, кемдер бер килгәнен ала — һәркем үзенә кирәклесен сайлый. Гәзитне пропагандалау максатыннан ай саен Уфа “Нур” татар дәүләт театрында чыгыш ясарга берәр район вәкилләрен чакырабыз. Алар үз районнарыннан чыккан сәхнә осталары белән бер­лектә концерт куя. Бу — “Кызыл таң”ның җырлы кичләре” дип аталган зур проект. ПДФ абунә­челәребез бар, сайтта электрон киосклар булдырдык, электрон гәзит ясадык, анда онлайн телевидение эшләп килә. Бу альтернатив чаралар гәзитнең гомерен озынайту, хәлен яхшырту максатында тормышка ашырыла”.
Икенче көнне шул ук залга делегатлар пленар утырышка җыелды. Конгресс башкарма комитеты рәисе Ринат Закиров бер еллык эшкә йомгак ясады. Аның чыгышының күп өлеше милли мәгариф һәм татар телен саклау проблемаларына багышланды. Аннары барлык комиссия җитәк­челәре үзлә­рендә элекке көнне күтәрелгән мәсьәләләр турында сөй­лә­де.Чыгыш ясаучылар арасын­да Башкортстаннан икътисад фәннәре докторы, профессор Касыйм Йосыпов та бар иде.
Киңәйтелгән утырышта катнашучылар, чыгыш ясаучыларны тыңлап, фикер алышканнан соң, резолюция кабул итте