-16 °С
Болытлы
Гәзиткә язылуVKOKTikTokINSTAGRAM
Барлык яңалыклар
Җәмгыять
12 март 2015, 22:59

Мондый “химия” безгә кирәкме?

Башкортстан яшелчәчеләре язны чит илдән кыяр, кәбестә кертүне чикләү максаты белән каршылый.Русиядә табигый-климатик шартлар, экзотик төрләрен исәпләмәгәндә, үзебезнең халыкны яшелчә-җимеш белән тулысынча тәэмин итәргә мөмкинлек бирә. Әмма, ни сәбәп­ледер, чит илдән кертелгәненә өстенлек бирәбез. Русия Авыл хуҗалыгы министрлыгы мәгълүматларына кара­ган­да, мәсәлән, илнең сәүдә базарына елына уртача бер миллиард долларлык помидор кертелә. Кыярга ихтыяҗны ка­нәгатьләндерү өчен 256 миллион доллар тотынылса, импорт суганына 250 миллион доллар сарыф ителә. Телгә алын­ган яшелчәләрнең кайсыларын Русиядә үстереп булмый?Сәүдә киштәләре бай, аннан ел әйләнәсенә яшелчә-җимешнең бер төре дә өзелми. Иран, Кытай, Төркиядән кертелгән кыяр-помидорларга ихтыяҗ кимеми. Русия яшелчәчеләр берлеге рәисе Сергей Королев күптән түгел республика журналистлары белән очрашуда яшелчә импортының еллык күләме 2,5 миллиард долларга җитүен белдергән иде. Сумга әйләндергәндә, бу 150 миллиард сум дигән сүз. Тагын да аңлаешлырак итеп әйткәндә, чит ил яшелчәчеләренең эшчәнлеген дәртләндерүгә Русиядән шул күләмдә акча озатыла.Башкортстанда әлеге тармак яңа үсеш юлына басып килә. Дәүләт программасы кабул ителде. 2010 елда республикада 255 мең тонна яшелчә җитештерелгән булса, былтыр ул шушы ук мәйданда 355 мең тоннага җитте.Тармакны үстерү юллары нинди? Яшелчә үстерүчеләрнең проблемалары ни дәрәҗәдә хәл ителә, Кырмыскалы районында узган республика киңәшмәсендә сүз шул хакта барды.

Кызганычка каршы, халыкара сәүдә оешмалары кануннарына ярашлы, Русиянең дәүләт чикләрендә илгә кертелүче туклану продуктларында пестицидлар күләмен билгеләүче контроль тикшерү бетерелде. Димәк, кибеттән нинди ризык сатып алуыбыз турында фәкать үзебез уйларга тиеш.


Яшелчәчелек тармагын үстерү проблемаларының ил күләмендә күтәрелүе очраклы түгел. Ул узган елның көзендә Русиягә кертү тыелган биш төр туклану продуктлары исемлегенә кертелгән иде. Шул ук вакытта, яшелчә импортына ихтыяҗ зур килеш саклана. Ел саен, мәсәлән, илнең эчке базарына бер миллион тоннага кадәр яшелчә кертелә. Көнбатыш илләренең санкцияләренә бәйле, хәзер бу тармакны да үзебездә үстерү өчен алшартлар туды. Берлек рәисе Сергей Королевның төбәкләр буйлап эш сәфәрендә йөрүе дә раслый моны.
— Санитар туклану нормасы буенча, Ру­сиядә яшәүче һәркем елына 186 килограмм яшелчә ашарга тиеш. Чынлыкта ул 105,5 килограммнан артмады. Бу, илдәге мөм­кин­лектән чыгып фикер йөрткәндә, бик аз, — диде киңәшмәдә Сергей Валерьевич. — Бүген илдә яшелчәчелек тармагын үстерү өчен уникаль шартлар туды. Хөкүмәт продукцияне ачык һәм ябык грунтта үстерү һәм җитеш­терелгәнне саклау белән шөгыльләнүче хуҗа­лыкларга һәм инвес­торларга ярдәм күр­сәтергә әзер.