Барлык яңалыклар
Җәмгыять
17 март 2015, 21:33

Алар яуга күтәрелгән корал һәм каләм белән!

“Кызыл таң” гәзитенең Хәтер эстафетасы Илеш районында дәвам итте.Башкортстанның 19 районы аша узачак Бөек Җиңүнең 70 еллыгына багышланган “Корал һәм каләм” белән республика журналистлар марафоны 12 мартта Илешкә килеп җитте. Дүртөйлеләрдән кабул итеп алынган штандартны илешлеләр Благовар районы вәкилләренә тапшырды.

Бөек Ватан сугышы башланган чорда районда “Җиңү таңы” гәзите чыгып килә. Шул гәзиттә эшләүче кайсы ир-егет журналистларның турыдан-туры фронтка китүе турында “Маяк” район гәзите архивында төгәл генә мәгълүмат юк. Аның каравы, “Җиңү таңы” (хәзерге “Маяк”) гәзитенең беренче мөхәррире булган, 1939 елның 21 февраленнән “Коммуна” (хәзерге “Кызыл таң”) гәзитенә җитәкчелек иткән Шәрәфи Шәймардановның Бөек Ватан сугышы башлануның беренче көненнән үк фронтка китүе мәгълүм. Кызганычка каршы, аның Бөек Ватан сугышыннан соңгы язмышы билгесез. Шуннан чыгып, Шәрәфи Тимерҗан улының яу яланында ятып калганлыгын фаразларга була.
1947 елның ноябреннән “Сталинчы” (“Җиңү таңы” ул вакытта шул исемгә үзгәртелә) гәзитенә мөхәррирлек итүче Әхмәтгәрәй Басыйров та Бөек Ватан сугышы башлануның беренче көннәреннән (бу вакытта ул КПСС Өлкә комите­тының радиотапшырулар комитеты рәисе урынбасары булып эшләгән була) фронтка китә һәм, 1946 елның мартында гына туган ягына әйләнеп кайта. Сугышта күрсәткән батыр­лыклары өчен Әхмәтгәрәй Бәхтияр улы I-II дәрәҗә “Ватан сугышы”, Кызыл Байрак орденнары, күпсанлы медаль­ләр белән бүләкләнә. Әх­мәтгәрәй Басыйров 1961 елда хаклы ялга киткәнгә кадәр район гәзитендә төрле вазыйфаларда эшли, 1999 елның ок­тябрендә 98 яшькә җитеп вафат була.

Илеш районыннан барлыгы 10220 кеше фронтка озатыла, шуларның 6841е яу кырында ятып кала.


Штандартны тантаналы шартларда “Благовар хәбәр­ләре” гәзите баш мөхәррире Анатолий Максимовка тапшырганда “Илеш мәгълүмат үзәге” директоры Рөстәм Хисаметдинов Бөек Ватан сугышында катнашкан, төрле елларда район гәзитенә җитәк­челек иткән журналистларның һәммәсенең исемнәрен хөрмәт­ләп телгә алды, Бөек Җиңүнең 70 еллыгы уңаеннан “Корал һәм каләм белән” марафонына старт бирүче “Кызыл таң”­чыларга Илеш районы хаки­мияте һәм “Маяк” гәзите редак­циясе коллективы исе­меннән рәхмәт сүзләре җит­керде. Шулай ук Рөстәм Дирһаметдин улы “Маяк”ның 80 еллык юбилее уңаеннан махсус китап чыгуы, анда алда телгә алынган ике яугир-журналист хакында мәгълүмат бирелүе турында да әйтеп үтте.
Штандартны озакламый чакмагышлылар кабул итеп алачак.