Исламга тугры

— Мәчет халык акчасына төзелде. Шулай ук район җитәкчелеге, оешмалар, депутатлар ярдәме зур булды. Эшне башлап йөрүче, Дмитриева Полянада туып-үскән, бүген Уфада яшәүче Фәнис Кәримовның ярдәмен, тырышлыгын аеруча билгеләр идем, — ди мәчетнең имам-хатыйбы Нурислам хәзрәт.
Моңа чаклы район үзәгендә мәчет булмый. Өч ел элек Нурислам хәзрәт имам итеп сайлангач, мәчетне файдалануга тапшырырлык дәрәҗәгә җит­керү өчен тырышлык сала. Элемтә булдыру, төзүчеләрне хәстәрләү, оештыру эшләренә өлкән яшьтә булуына карамастан, имам-хатыйб йөгергәләп кенә тора.
Барлык эчке эшләрне: җылылык, электр үткәрүгә, агарту-бизәүләрне, тыштагы кирәк-яракны булдыруга изге күңелле Фәнис Минзаһит улының уңган кулы тигәнлеге, чын күңел биреп эшләгәне тоела. Матур гамәлләре өчен якташлары, райондашлары аңа олы рәхмәтле. Бүген дә ул, хәл белеп, һәрьяклап ярдәм итеп тора. Әйткәндәй, Фәнис Минзаһит улы, Мичурин балалар йортындагы сабыйларны сөендереп, аларга “Әллүки” журналына подписка да бүләк итте, моның өчен аңа без дә рәхмәтле.
Киләчәктә дә бихисап эшләр башкару күз уңында тотыла. Аскы катта мәдрәсә, мәчет алдында кибет ачарга исәп тоталар. Китаплар, дини атрибутика, хәләл ризык сатуны оештырырга уйлыйлар. Чөнки мәрхүмнәрне искә алу, никах кебек мәҗлесләрдә хәләл ризыклар гына ашарга тиешбез, ди имам-хатыйб. Мәчет ачылганнан бирле биредә 15 никах укылган, 14 балага исем кушылган. Көненә биш тапкыр азан яңгырый, намаз укыла. Туймазы мәче­теннән Билал хәзрәтне ярдәм­гә чакырганнар. Ул да азан әйтә, төштән соң балаларны Коръән, намаз укырга өйрәтә. Әлеге вакытта ун бала зур теләк белән сабакка йөри. Ислам университетында белем алган Мәсрүрә ханым чәр­шәмбе һәм җомга көн­нәрендә гарәп алфавитын, Ислам дине кануннарын өйрә­нергә теләүче хатын-кызларны укыта.
Ни өчен мәчетне “Ихсан” дип атаганнар соң? Баксаң, күршедә генә бик укымышлы, диндар әби яшәгән. Моннан берничә ел элек төзү эшләре башлангач, ул оештыру эш­ләрендә актив катнашкан. Аның зур үтенече буенча шушы исем бирелгән. “Ихсан” сүзе “Ислам диненә тугры” дигәнне аңлата”, — дигән.
Әйе, ерактан ук балкып, иман нуры чәчеп торучы мәчеткә район халкы сөенеп йөри. 6 меңнән артык кеше яшәүче Шаран авылы би­ләмәсендә мәчет бинасы ишекләре ачылу район халкы өчен бик әһәмиятле. Фәнис Минзаһит улы мәчетнең исе­менә бер-бер артлы алышынып янучы төсле утлар уйнатучы җиһаз урнаштырган. Кояш бату белән ул үзе кабына. Шулай, биек манаралар көндез генә түгел, караңгы төннәрдә дә салават күпере төсләренә кереп, Шаранны яктыртып балкып тора.