Русиянең визит карточкасы!

“Уфа” аэропортында яңа халыкара терминал төзелде. Тантанада ШОСның генеральный секретаре Дмитрий Мезенцев, Русиянең транспорт министры Максим Соколов, Башкортстан Башлыгы Рөстәм Хәмитов һәм ШОС илләренең транспорт министрлары катнашты.
— Русиянең авиация тармагы үсештә, “Уфа” — Русия­дәге иң зур аэропортлар исә­бендә. Заманча объект илебез транспорт тармагының тотрыклы үсештә булуын раслый, — дип ассызыклады Максим Соколов.
“Уфа” аэропортының яңа терминалы “2Е” категориясенә карый һәм 17 мең квадрат метр мәйданны били. Хәзер аэропорт “Боинг-747”, “Боинг-777” һәм башка очкычларны да кабул итә ала. Чит илгә очучылар 13 урында теркәлә ала, ә паспорт контроле үтү өчен 40 кабина махсус җиһазландырыл­ган. Өч телескопик трап булуы да пассажир­ларның юл мәшә­катьләрен күпкә җиңеләйтә. Аэропорт июльдә узачак саммитлар кунакларын кабул итәргә тулысынча әзер.
Әйткәндәй, башкаланың транспорт системасы камил­ләшүен дәвам итә, 2016 елда Уфа шәһәр электричкасын сафка кертү күзаллана. Бу хакта шәһәр яны маршрутларында пассажирлар ташуны оештыру һәм “Шәһәр электричкасы” проекты буенча инфраструктура объектларының әзерлеге мәсьәләләре буенча 4 июньдә үткән эшлекле очрашу барышында “Башкортстан шәһәр яны пассажирлар” компаниясе генеральный директоры Игорь Поляев белдерде. Очрашуда рес­пуб­ли­каның Транспорт һәм юл ху­җалыгы дәүләт комитеты рәисе Ильяс Мөниров, Уфа шәһәре хакимияте башлыгы Ирек Ялалов, Дәүләт җыелы­шы-Корыл­тай Комитеты рәисе Елена Родина катнашты.
Шәһәр эчендә халыкны транспорт белән тәэмин итү һәм пассажирларны хезмәт­ләндерүнең сыйфатын күтәрү максатында 2013 елда Дим — Уфа — Шакша участогында “Шәһәр электричкасы” проекты гамәлгә ашырыла башлады. 2014 ел азагына проектка 316 миллион сум акча салынган, Уфа шәһәре хакимияте — 240 миллион сум, Куйбышев тимер юл идарәсе 76 миллион сум бүлгән.
Димнән Шакшага кадәр — 11 станция. Димнән Уфага кадәр юл хакы – 18, Шакшага кадәр 37 сум булыр дип кү­заллана. Шәһәр электричкасы йөри башлау белән уфа­лы­ларның күпчелеге башкала чик­ләрендә автомобиль­ләрдән баш тартачак, дип исәпли белгечләр. Электрич­ка­ның маршруты буенча транспорт үзәкләрендә махсус парковкалар булачак. Пассажир автомобилен шунда калдырып, җәмәгать транспортында юлын дәвам итә алачак.