Буыннар бәйләнеше өзелмәсен

“Кызыл таң” гәзите редакциясе игъ­лан иткән Хәтер марафонына мәктәп укучылары да җәлеп ителде. Алар китапханәләрдә, Интернет челтәрендә, районның тарих һәм туган якны өйрәнү музеенда булган материалларны игътибар белән өйрәнеп, Бөек Ватан сугышы вете­раннары һәм тыл хезмәтчәннәре белән очрашып, ул дәһшәтле еллар хакында мәгълүматын арттырды.
Бүздәк районыннан дошман белән алышка 8756 кеше киткән. Аларның яртысыннан күбрәге яу кырларында башын салган яисә хәбәрсез югалган. Дүрт райондашыбызның — Советлар Союзы Герое, икесенең Дан орденының тулы кавалеры булуы — якташ­ларыбызның батырлыгына ачык дәлил. Бүгенге көндә районда сугыш ве­тераннарының 37се исән-сау.
Үзе теләп дошман белән аяусыз сугышка китүчеләр арасында Бүздәкнең 40 кыю кызы да бар. Аларның берсе — Майпәрвәз Сакаева илебез иминлеге өчен яуда башын салган. Район үзәгендәге урамнарның берсе шушы батыр кызның исемен йөртә.
Җиңүнең бихисап корбаннар, михнәтләр бәрабәренә яулануын онытырга хакыбыз юк. “Бүздәк яңалыклары” гәзите дә шушы максатта күп чаралар оештыра. Әйтик, ел саен Җиңү көненә багышланган җиңел атлетика эс­тафетасы үткәрү матур традициягә әверелде. Мәктәпләр, төрле оешмалар командалары анда бик теләп катнаша. Быел редакция “Тере тарих” һәм “Ветеран белән фото” конкурслары, сугыш темасына язылган шигырьләр бәйгесе игълан иткән иде.
Гәзитнең элекке мөхәррире, районыбызның шәрәфле шәхесе Әнәс Исаргаковның да фронтовик булуы белән горурланабыз, аның хакындагы якты истәлекне кадерләп саклыйбыз. Көчле рухлы, фидакарь буын вәкиле буларак, эшен тирәнтен белгән, беренче чиратта үзенә карата таләпчән, кешелекле, ихлас, дәрманлы, талантлы җитәкче булды ул.
Җиңү көне алдыннан район үзәгендәге һәлак булган яугирләр һәйкәле янында үткән тантанада бәйгедә җиңүчеләргә район гәзите редакциясе дипломнары һәм истәлекле бүләкләр тапшырылды.