Алар - чын егетләр иде...

Киңкүләм мәгълүмат ча­ралары тәүдә Башкортстаннан ике егетнең һәлак булуын хәбәр итте, аннары алар өчкә әйләнде, шуннан янә икәү өстәлде. Хәрабәләр актарылып, соңгы солдат табылганчы, ут йотып тордык. Республикабыз нык каза күргән төбәкләрнең берсе: 23 корбанның бишесе — безнеке. Салават районының Малояз авылыннан Рөстәм Шәйхуллин, шул районның Әлкә авылыннан Ранис Алтынбаев, Сибай шәһәреннән Рөстәм Йомагулов, Чакмагыш районының Сыерышбаш авылыннан Фидан Мамлиев, Белорет шәһәреннән Вадим Нәфыйков армия сафларына июнь азагында чакырылалар. Соңгы икесенә — 19 яшь. Арада иң өлкәне — Рөстәм Йомагулов — Башкортстан дәүләт университетының химия фа­культетын тәмамлаган. Пе­дагогларның хәрби хезмәткә чакырылмау мөмкинлеге булса да, армияне сайлаган. Рөстәм Шәйхуллин Уфа дәүләт авиация техник университетының өченче курсын бетергән. Ватан алдындагы бурычын үтәп кайтканнан соң укуын дәвам итәргә хыялланган.
Әйе, хәзерге яшьләр арасында да “Ватан алдындагы изге бурыч”, “Туган илне сөю” кебек төшенчәләрне барыннан да өстен куючылар байтак. Армия — егетне чын ир итүче, чыныктыручы тормыш мәктәбе. Бүген хәрби хезмәт, чыннан да, хезмәт булып кына күз алдына баса. Шөкер, “кайнар нокта”ларда сугышлар тынды, булганына да хәзер контракт­чылар гына җибәрелә. Алар — армия хезмәте үтеп, кулына корал тота белгән тәҗрибәле солдатлар.