Велосипед дуласа, машинадан яман!

Юл-транспорт фаҗигаләре статистикасын карагач, мәгълүм мәкальне шулай дип үзгәртәсе килә.27 июльдә төшке аш вакытында урамга чыктым. Карасам, редакциябез урнашкан “Матбугат йорты” янындагы Пархоменко һәм Октябрьнең 50 еллыгы урамнары чатына халык өелешкән. Аптырап, яннарына бардым. Светофор төбендә – карарлыгы да калмыйча җимерелгән велосипед, юл уртасында япма белән капланган мәет ята. Шунда ук авария сигналлары кабынган бер фура тора. Водителен бер төркем ЮХХДИ хезмәткәрләре уратып алган. Өлкән яшьтәге ир шок хәлендә – сүз дә әйтә алмый. Баксаң, велосипедчы егет җәяүлеләргә тәгаенләнгән “зебра” аша үтеп барганда, аны уң якка борылыш ясаучы фура таптаткан икән. Гаеп кемдә? Светофорда икесенә дә яшел ут яна. Беренче карашка, җавап гади кебек. Борылыш ясаучы машина юл аша чыгучы җәяүлеләрне, шул исәптән велосипедчыларны да, үткәрергә бурычлы. Ләкин шунысы бар: юл кагыйдәләре буенча, велосипедчы “тимер атыннан” төшеп, урам аша җәяү үтәргә тиеш. Ә 28 яшьлек каза күрүче тротуарның велосипедлар өчен бүленгән өлешеннән ничек җилдереп килсә, шул ук тизлектә урам чатына килеп кергән. Фура хуҗасы тормозга һәм тавыш сигналына басып өлгерсә дә, инде соң булган. Җитмәсә, велосипедчының колагында – наушниклар. Музыка тыңлап барып, берни дә ишетмәгәндер, күрәсең. Нәтиҗәдә, янә бер яшь гомер өзелде...

Быелгы җәй велосипедчылар өчен аеруча хәвефле булды. ЮХХДИ китергән юл-транспорт фаҗигаләре статистикасына күз салсаң, чәчләр үрә тора. 11 июньдә Уфаның Вологда урамында ВАЗ-2114 автомобиле велосипедчы өстенә менә; шул ук көнне Салават шәһәрендә “Opel Vectra” велосипедтагы 14 яшьлек яшүсмерне таптый. 17 июньдә Бөрҗән районының Иске Собхангул авылында “Fiat Albea” велосипедчыны таптап үтерә. 28 июньдә Авыргазы районының Сәмән авылында “Kia Spectra” автомобиле янә бер велосипедчының гомерен өзә. 16 июльдә Уфаның Революцион һәм Ленин урамнары киселешендә “НефАЗ” автобусы борылыш ясаганда, юл аша чыгып баручы велосипедчы өстенә менә. 4 августта “ГАЗ-Луидор” микроавтобусы юлны тиешсез урында кисәргә маташучы тугыз яшьлек малайны таптый. 5 августта “Chery A13” автомобиле Беренче май урамында руль артына 13 яшьлек бала утырган велосипед белән бәрелешә. Шул ук көнне башкаланың “Планета” сәүдә-күңел ачу үзәге территориясеннән чыгып барган “Reno Logan” автомобиле велосипед өстенә менә. Каза күрүче тән җәрәхәтләре белән дәваханәгә озатыла. Кызганычка каршы, бу күңелсез статистика үскәннән-үсә бара.
Китерелгән мәгълүматлардан гына ике тәгәрмәчле транспорт хуҗаларының гаебен ачыклау авыр. Ләкин бу статистикада гаеп ачыктан-ачык велосипедчыларда булган очраклар да шактый. Мәсәлән, июнь аенда Уфада тротуардан атлаган җәяүлене велосипед юлы буенча җилдерүченең бәрдереп качуы турында барча Интернет мәгълүмат чаралары шаулады. Ә 5 майда Зеленоград шәһәрендә Башкортстаннан килгән велосипедчы светофорның яшел утына юл аша чыгып барган җәяүлене таптый. Димәк, һәр фаҗиганең сәбәбен автомобильчеләргә генә кайтарып калдыру дөрес булмас. Гаеп атта да, тәртәдә дә, дигәндәй.

Читайте нас:

Теркәлү саны: 2019 елның 24 маендагы Эл сериясе № ФС 77-75682.

Басманың яшь категориясе 12+

___________________

Сетевое издание «KizilTan» зарегистрировано Федеральной службой по надзору в сфере связи, информационных технологий и массовых коммуникаций (РОСКОМНАДЗОР)

Регистрационный номер: серия Эл № ФС 77-75682 от 24 мая 2019 г.

Возрастная категория издания 12+

Гамәлгә куючылары: Башкортстан Республикасы Матбугат һәм киңкүләм мәгълүмат чаралары агентлыгы, Башкортстан Республикасының “Республика Башкортостан” Нәшрият йорты дәүләт унитар предприятиесе.

____________________

УЧРЕДИТЕЛИ: Агентство по печати и средствам массовой информации Республики Башкортостан, Государственное унитарное предприятие Республики Башкортостан Издательский дом «Республика Башкортостан».

Баш мөхәррир Фаил Камил улы Фәтхетдинов.

Кабул итү бүлмәсе телефоны: 8 (347) 272-13-61.

___________________

Главный редактор: Фатхтдинов Фаил Камилович.

Телефон приемной: (347) 272-13-61.

Телефон

8(347)272-13-61

Электрон почта

kyzyltan@mail.ru

Адресы

450079, Уфа шәһәре, Октябрьнең 50 еллыгы урамы, 13 нче йорт

Реклама хезмәте

8(347)272-62-27

Хезмәттәшлек

8(347)272-62-27