Кырмыскалы – икмәкле төбәк

— Тәмле икмәкнең сере – эшче­ләребезнең аңа мөнә­сәбәте, эш шартлары, колмак, тәҗрибәле оста куллар һәм биредәге һава үзе, — дип шаярта икмәк комбинаты директоры Альфира Богданова.
Составы гап-гади: он, су, колмак чүпрәсе, тоз. Альфира Идрис кызы әй­түенчә, рецепт бер үк булырга мөм­кин, тик күп нәрсә әзерләү техноло­гиясенә бәйле.
Чыннан да, алар җитеш­тергән продукцияне күпләр кибет киштәсен­нән эзләп ала. Комбинат узган елда “Кырмыскалы икмәге” товар билгесе алган. Район кулланучылар җәм­гыяте карамагындагы пред­приятие куәт­ләрне, продукция төрләрен арттыру, яңа технологияләр кертү буенча актив эшли. 90нчы елларда нигез салынган икмәк комби­на­тының яңа бинасын төзү 2011 елда дәвам итә. Бер елдан сафка кертелгән объект 24 миллион сумга төшә.
Бик күп тәкъдимнәрне өйрәнгән-нән, күргәзмәләрдә булганнан соң, икмәк пешерү өчен традицион кирпеч мичләр салдырырга карар итәләр һәм отылмыйлар. Мондый мичтә пешкән икмәк хуш исле һәм тәмле була. Тагын бер елдан печенье һәм прәннек җитеш­терү цехы эшли башлый. Кырмыскалы икмәк комбинатында тәүлегенә 14 тонна икмәк һәм 800 килограмм кондитер эш­лән­мәләре җитештерелә. Продукция төре исә 15тән 95кә җиткән. Тагын крендель җитеш­терү җиһазы сатып алырга ниятлиләр. Яңа цехлар сафка кер­телгәч, 30 өстәмә эш урыны ачылган. Бүген коллективта 131 кеше хезмәт сала.
Комбинат продукциясен респуб­ликаның 20дән артык районына озата. Уфада – 380, Стәрлетамакта — 80, Кырмыс-калының үзендә 200 сәүдә ноктасы бар. Аларга продукцияне 13 машина илтә.
— Күрше төбәкләрдән килгән коллегаларга цехларны күрсәтеп, тәҗ­рибә уртаклашканнан соң да аларның про­дукциясенең тәме башкача килеп чыга, — ди җитәкче.
Димәк, Кырмыскалы ик­мәге­нең тәме – онытылмас, аны пешерү неч­кәлекләре барыбызга да сер булып калсын.